El Táýelsizdiginiń 30 jyldyǵyna oraı, Kókshetaýda «Birgemiz» respýblıkalyq volonterler front-ofısiniń ókilderi oblystyń volonterlik korpýsymen kezdesti, dep jazady Egemen.kz.
Is-sharaǵa «Birgemiz» respýblıkalyq volonterler front-ofısiniń basshysy Tatıana Mıronıýk, front-ofıstiń sarapshysy Oljas Ábdýhamıtov jáne óńirdegi volonterlik uıymdardyń belsendileri, jastar resýrstyq ortalyǵynyń basshylary qatysty.
Kezdesý barysynda qatysýshylar volonterliktiń jol kartasyn júzege asyrý, volonterlik qyzmetti qoldaý standartyn ázirleý máselelerin talqylady. Eriktilerdiń eren isin damytýdyń jańa qyrlary izdestirildi. Bul tarapta kezdesýge qatysýshylar ózderiniń oıymen bólisip, paıymdy pikir bildirdi.
Tatıana Mıronıýk atap ótkendeı, búginde Qazaqstanda 600-ge jýyq volonterlik uıym jumys isteıdi. Jyl saıyn elimizde belsendi azamattyq ustanymyn kórsetýge jáne muqtaj adamdarǵa kómektesýge nıet bildirgen eriktiler sany kóbeıip keledi. Aqmola óńirinde de koronavırýs habary shyqqaly elge qaıyrymdylyq jasaǵany az emes. Onyń barlyǵy - qysylǵan janǵa demeý bolsa, jastarǵa ómirsheń ónege, ádemi úlgi. Búgingi kúni myńdaǵan eriktiniń basyn quraıtyn 90 uıym jumys isteıdi.