Tokıoda júrgen Qazaqstan sportshylary búginde Olımpıadaǵa saqadaı saı. Dúbirli doda qarsańynda el sportshylary týraly birneshe qyzyq derek usynamyz.
63 er men 33 áıel
Japonııa jerinde 96 otandyq atlet sporttyń 27 túrinen baq synaıdy. Qurama sapynda 63 er men 33 áıel sportshy bar.
Tuńǵysh ret Tý ustaıdy
Bokstan álem chempıonatynyń eki dúrkin kúmis júldegeri Qamshybek Qońqabaev pen London Olımpıadasynyń chempıony Olga Rypakova Olımpıadanyń ashylý saltanatynda tuńǵysh ret Tý ustap shyǵady.
Salta brendi
Olımpıadaǵa Qazaqstan delegasııasy arnaıy tapsyryspen daıyndalǵan kıimmen attandy. Salta brendimen tanymal Saltanat Baımuhamedova –olımpıadalyq kıimniń dızaıneri. Qazaqstandyq sportshylarǵa arnalǵan sporttyq jeıdeni ıspandyq Joma kompanııasy jasady.
Kim kenje?
Qazaqstan Olımpıadalyq quramasy sapyndaǵy eń jas sportshy 19 jasta. Ol – kórkem gımnastıkadan Azııa chempıony Alına Ádilhanova.
Jeti joldama jeńip aldy
Mılad Karımı – sporttyq gımnastıkadan Olımpıadanyń jeti joldamasyna ıe bolǵan jalǵyz atlet. Ol Tokıoda ótetin dodada kópsaıys, erkin jattyǵý, qoldy tirep sekirý, qossyryq, shyǵyrshyq, kerme jáne gımnastıkalyq at snarıady boıynsha jarysqa qatysady.
Tarıhı jetistik
20 jyldan keıin alǵash ret Qazaqstannan úsh sadaqshy Olımpıadada komandalyq jarysta synǵa túsedi. Sanjar Musaev, Denıs Gankın jáne Ilfat Abdýllın Nıderlandtyń Hertogenbos qalasynda ótken álem chempıonatynda altynshy oryn ıelendi. Olımpıadada komandalyq joldamaǵa ıe bolǵan olar sondaı-aq jekeleı synda da óner kórsetedi.
Komandadaǵy jalǵyz qurama
Sý dobynan erler quramasy komandalyq oıyn túrlerinen jarysqa qatysatyn qazaqstandyq jalǵyz qurama bolyp otyr. Olar Olımpııa oıyndaryna segiz jyldan keıingi úzilisten soń oraldy.