Aýyldyq okrýgter ákiminiń saılaýy ózgeshe ótpek. Bul ákimniń oryntaǵynan úmittilerdi de, olarǵa daýys beretin aýyl turǵyndaryn da belsendilik tanytýǵa shıryqtyryp otyr.
Oblystyq aýmaqtyq saılaý komıssııasynyń tóraǵasy Azamat Aımanakýmovtiń málimetine súıensek, Atyraý qalasy men alty aýdandaǵy 18 aýyldyq okrýgtiń ákimi saılanady. Al Maqat aýdanynda 1 kent pen 2 aýyldyq okrýg ákimderiniń saılaýyn ótkizý josparlanbaǵan. Sebebi bul aýdandaǵy okrýg ákimderiniń ókilettik merzimi aıaqtalmaǵan.
– Ákimderi saılanatyn okýrgterde 44 myń 500 saılaýshy bar. Qazir bul okrýgterde 236 saılaý komıssııasy quryldy. Okrýg ákimderiniń saılaýyna 73 úmitker usynylǵan. Onyń ishinde 39 úmitker (53,4%) – saıası partııalardyń ókili. Al 34 úmitker (46,6%) ózin ózi usynyp, ákim saılaýyna qatysýǵa nıet bildirdi. Máselen, Nur Otan partııasy 15, «Aýyl» HDPP – 5, «Aq jol» QDP – 3, ADAL partııasy – 6, Qazaqstan halyq partııasy – 7 kandıdat, JSDP 3 úmitker usyndy. Ortasha básekelestik 4 adamdy qurap otyr.
Onyń aıtýynsha, okrýg ákimderiniń saılaýyna usynylǵan úmitkerlerdiń arasynda 34 muǵalim (46,6%), 12 zańger (16,4%), 10 ekonomıst (13,7%), 8 aýyl sharýashylyǵy mamany (11%), 1 ınjener (1,3%) men basqa mamandyqtyń 8 ıesi (11%) bar. Saıası dodadan 19 áıel (26%) de shet qalǵysy kelmedi. Al eń kóp úmitker Damby aýyldyq okrýginen usynylǵan. Atyraý qalasyna taıaý ornalasqan bul aýylǵa ákim bolǵysy kelgen 7 úmitker baq synaýǵa bekinipti. Sondaı-aq Qaıyrshaqty (Atyraý qalasy) men Jarsýat (Inder aýdany) aýyldyq okrýgterinde 6, Qurmanǵazy aýdanyndaǵy Kýdrıashov aýyldyq okrýginde 5 úmitker saılaýǵa qatysýǵa nıet bildirdi.
– Aýyl ákimderiniń saılaýy – elimizdegi demokratııalyq damýdyń bir kórinisi. Bul saılaýǵa Nur Otan partııasynan usynylǵan úmitkerlermen kezdesip, basqarý júıesindegi tetikter jóninde ózimniń tájirıbemdi, keıbir usynystarymdy bólistim. Eń bastysy, aýyl turǵyndary okrýg ákiminiń laýazymyna úmitkerlerge daýys beredi. Elimizde buryn mundaı saılaý bolǵan emes. Buǵan deıin aýyl ákimderi aýdandyq, qalalyq depýtattardyń daýys berýimen saılanatyn edi. Endi, mine, bar jaýapkershilik júktelgen aýyl turǵyndary iskerlik, uıymdastyrýshylyq qyry basym úmitkerlerdi tańdaıtyny daýsyz, – deıdi Májilis depýtaty Nurlybek Ojaev.
Aýyl ákiminiń oryntaǵy úshin saılaý dodasyna túsken úmitkerler saılaýshylarǵa baǵdarlamasyn usynyp, úgit-nasıhatyn bastady. Baq shaba ma, álde baǵdarlama oza ma?
Atyraý oblysy