Qazaqstan Áýe qorǵanysy kúshteriniń bas qolbasshysy avıasııa general-leıtenanty Nurlan Ormanbetov bastaǵan komıssııa Shyǵys Qazaqstan oblysynda ornalasqan áskerı bólimderdi tekserdi, dep habarlaıdy Egemen.kz Qorǵanys mınıstrligine silteme jasap.
Tekserý barysynda áskerler qyzmetin uıymdastyrý, qarý men oq-dárilerdiń, materıaldyq qorlar men janar-jaǵarmaı materıaldarynyń saqtalýy, sondaı-aq zenıttik zymyran dıvızıondary men radıolokasııalyq bólimsheler jeke quramynyń áýe keńistigin kúzetý boıynsha jaýyngerlik kezekshilikti atqarýy máselelerine erekshe nazar aýdaryldy. Komıssııa áskerı qyzmetshilerdiń áleýmettik-turmystyq jaǵdaılaryn da tekserdi.
– Búgin áýe shabýylyna qarsy qorǵanys mamandary jaýyngerlik ázirliktiń talap etiletin deńgeıin ustaýmen qarqyndy jaýyngerlik daıarlyq júrgizedi, kúrdeli tehnıkany meńgeredi. Onyń aıqyn dáleli retinde TMD áýe shabýylyna qarsy qorǵanystyń birikken júıesinde áskerlerdi ár túrli tekserý, jaýyngerlik oq atýmen oqý-jattyǵýdyń jáne jattyqtyrýdyń joǵary nátıjelerin aıtýǵa bolady, – dep atap ótti bas qolbasshy.
Tekserý nátıjeleri boıynsha komandırlerge usynymdar men birqatar nusqaýlar berildi. Odan basqa, olarǵa qarý men oq-dárilerdi saqtaý, qujattamany júrgizý máselelerinde basshylyq qujattardyń talaptaryn saqtaýǵa baılanysty praktıkalyq kómek kórsetildi.