Qaraǵandyda eki er adam jasóspirimge shabýyl jasady. Tóbeles órbigen kezde masaıǵan adamdar balany pyshaqpen jaraqattaǵan. Bul týraly jábirlenýshiniń anasy «Vechernıaıa Karaganda» Telegram-arnasyna jazdy, dep habarlaıdy Egemen.kz.
Qaraǵandy turǵyny Aısulý Mataeva «Vechernıaıa Karaganda» Telegram-arnasyna Mıhaılovkadaǵy «Steklıashka» aıaldamasynda avtobýs kútip turǵan balasyna mas kúıindegi eki er adam jaqyndaǵanyn jazdy. Olar ózderin ádepsiz ustap, jandarynan ótip bara jatqan adamdardy balaǵattaǵan.
16 jasar Temirlan olardan tynyshtyq saqtaýdy ótingen kezde er adamdar buǵan nazar aýdaryp, «Sen kimsiń? Bizdiń kim ekenimizdi bilesiń be?» degen sózdermen balany qorqyta bastaıdy.
«Olar ózderin «bedeldi avtorıtter» dep ataǵan sátte ulym eshkimdi bilmeıtinin aıtty. Sodan keıin tóbeles bastaldy. О́tip jatqan adamdar bolsa olardy ajyratyp alýǵa batyldary barmady!», dep renishin bildirdi Temirlannyń anasy.
Tártip saqshylarynyń aıtýynsha, oqıǵa barysynda eshkim aıtarlyqtaı jaraqat alǵan joq. Alaıda, Aısulý Mataeva tóbeles kezinde ulyna úsh pyshaq jaraqaty salynǵany týraly aıtty. Birinshi soqqy - basyna, ekinshisi - keýdege, úshinshisi - qolǵa tústi.
Oqıǵany vıdeoǵa túsirip úlgergen kýáger kadr syrtynda bireýdiń «pyshaǵyńdy laqtyr» dep aıqaılaǵanyn estigen.
«Osydan keıin meniń balam aýrýhanaǵa jetkizilip, jaraqattanǵan qolyna tigis salyndy», dep jazdy balanyń anasy Instagram-da jazdy.
Qaraǵandy oblysy polısııa departamentiniń baspasóz qyzmeti atalǵan fakti boıynsha qylmystyq is qozǵalǵanyn habarlady.
«Kúdiktiler anyqtalyp, qamaýǵa alyndy. Qazirgi ýaqytta tıisti saraptamalar taǵaıyndalyp, is boıynsha barlyq mán-jaılardy anyqtaý úshin tergeý sharalary júrgizilýde», dep túsindirdi Qaraǵandy polısııa qyzmetkerleri.