SQO PD esirtki qylmysyna qarsy is-qımyl bólinisiniń qyzmetkerleri Petropavlda 27 jastaǵy Aqtóbe qalasynyń turǵynyn ustady, dep habarlaıdy Egemen.kz.
Onyń sıntetıkalyq esirtkini jasyryp ketý ádisi arqyly taratqany belgili bolyp otyr. Ustaǵan kezde odan aq untaq tárizdi 9 túıinshek alyndy. Taǵy 16 túıinshek kúdikti kórsetken jasyrylǵan jerlerden jáne 3-ýi jalǵa alǵan páterden shyqty.
Sonymen qatar páterden esirtkini bólip salatyn quraldar da tabyldy, atap aıtqanda, gramdyq tarazy, ólsheýish qasyq, býyp túıetin materıal (zıpolktar, oqshaýlaý taspasy) alynǵan. Atalǵan fakti Sotqa deıingi tergep-tekserýdiń biryńǵaı tizilimine engizilip, esirtki satylymyn jazalaıtyn QK 297-baby boıynsha aıyptalatyn bolady.
«Saraptamanyń qorytyndysyna qaraǵanda alynǵan zat «mefedron» degen atpen belgili qazirgi tańdaǵy asa qaýipti esirtki bolyp tabylady. Tárkilengen zattyń jalpy salmaǵy — 49,15 gramm, bul asa iri kólemge jatady. Qarapaıym esep boıynsha odan bir ret paıdalanýǵa bolatyn 800 dozany alýǵa bolady. Qazir osyndaı sıntetıkalyq esirtkini taratýǵa qarsy kúreske erekshe kóńil bólinedi. Jyl basynan beri basqa qalalardyń turǵynyn ustaýdyń tórtinshi jaǵdaıy tirkelip otyr», deıdi SQO PD Esirtki qylmysyna qarsy is-qımyl basqarmasynyń bastyǵy polısııa polkovnıgi Jandos Basybaev.