Eleýsiz qalǵan eskertkish

Balýannyń beıitin erterekte kórgenbiz. Jolsaparda júrgen kezimizde jampozdyń jambasy tıgen jer týraly estigen soń ádeıilep at basyn burǵanbyz. Ol kezde memorıaldyq keshen ornatylmaǵan, zıraty toıǵan qozydaı tompıyp qana jatqan tusy edi. Jergilikti basylymdarda balýannyń baǵasyna je­teıikshi dep jan aıqaıyn jaz­dyq.

Keıin 2005 jyly memorıal-keshen turǵyzyldy. Ba­tyrlyqtyń baǵasyn bile­tin jurt­tyń qýanyshynda shek bol­ǵan joq. Arqanyń arys­ta­nynyń ózi bolmasa da rýhy týǵan elimen tabysyp, aq túıeniń qarny jarylǵan aıtýly oqıǵa boldy. 14 jasynan bastap bozkilemde beldeskende jaýryny jerge tıip kórmegen, keıin el ańyzǵa aınaldyrǵan neshe qıly kúsh ónerin kórsetken, shý asaýdyń qulaǵynda oınaǵan, et júregi eljireı súıgen Saryarqasyn sazdy áýenimen terbetken Balýan Sholaqty Alash balasynda estip-bilmegen adam joq shyǵar. Taıaýda taǵy da beıit basyna jol tústi. Asylynda biz ózgeni qaıdam, ýádege jomart halyqpyz ǵoı. On bes jyl bu­ryn memorıaldyq keshen ornatylǵanda, berilgen sertti sózde shek joq edi. Tarıhı oryn­nyń bútindigine jaýapty adamdar baladaı baptap kúte­miz desken. Aýyldan nebári bes sha­qyrymdaı jerdegi es­kert­kish keshenge baratyn taq­taıdaı jol salynady dep qudaı sózi – ýádelerin bergen. Biri de oryn­dalmapty. Jalpaq jurt­ty tal boıyndaǵy tamasha qa­sıet­terimen tánti etken ja­­ryq­tyqtyń kesheni jany ashy­mastyqtan tozyp ketken.

– Osy bes shaqyrym joldy kólikpen júrip ótkende beliń úzile jazdaıdy, – deıdi ba­lýannyń nemeresi Shaıdolla Sholaqov, – keshen de tozyp ket­ti. Kelimdi-ketimdi kisilerden uıat.

Oblystyq eskertkishterdi qorǵaý ortalyǵynyń basshylary balýannyń eskertkish kesheni qorǵalýǵa tıisti nysandardyń tizimine engizilmeı qalǵandyǵyn aıtyp otyr. Aldaǵy ýaqytta arnaıy komıssııanyń nazaryna usynbaq. Aýdanda da aýyz toltyryp aıtatyn is joq.

– Bıyl jobalyq-smetalyq qujattaryn jasaımyz, – deıdi aýdan ákiminiń orynbasary Oraz Smaǵulov, – qansha qarajat qajet ekendigi sol kezde belgili bolady. Ázirge qol qysqa.

Dúıim el rýhanı jańǵyryp, kemeldenip jatqanda, Balýan Sholaqtaı babamyzdyń ke­she­nin kelistirip, kútip ustaı al­maǵanymyz kórgen jannan uıat tipti!..

Aqmola oblysy,

Bulandy aýdany