Qazirgi tańda kásipkerlerge Ashyq júıesin paıdalaný mindet. Jaqynda «Atameken» UKP osy júıemen jumys isteıtin bıznesmenderdi memleket qoldaý kerektigin aıtyp, Memleket basshysyna usynyspen shyqqan edi.
«Atameken» Ulttyq kásipkerler palatasy jaqynda Úkimetke bıznestiń qatań karantındegi jumys algorıtmin usynǵan edi. Keıin Memleket basshysynyń qatysýymen ótken keńeıtilgen keńeste Ulttyq palatanyń birqatar usynysy qabyldanǵan bolatyn.
Jalpy Palata Ashyq jobasy arqyly anyqtalyp jatqan faktilerdiń azaımaı otyrǵanyn aıtyp keledi. Olardyń málimetinshe, búginge deıin Ashyq-qa 18 014 nysan qosylǵan. Joba aıasynda adal qyzmet atqarmaı otyrǵan, ıaǵnı kelýshilerdiń mártebesin teksermeı ótkizgen 1588 bıznes sýbekti jobadan alynyp tastalǵan. Árıne, qazirgideı pandemııa kezinde bul – bıznes ókilderine aıtarlyqtaı soqqy. О́ıtkeni Bas sanıtarlyq dárigerdiń qaýlysy boıynsha, tek júıege qosylǵan kásipkerlik nysandary ǵana jumysyn ári qaraı jalǵastyra alady. Sondyqtan UKP kásipkerlerge Ashyq jobasynyń tıimdiligin kúndelikti túsindirip, bıznesti adal atqarýǵa shaqyryp keledi.
Syrttaı qaraǵanda Ashyq júıesine tirkelý ońaı sııaqty kórinedi. Baǵamdasaq, kásipkerlik nysandaryn júıege qosý uzaqqa sozylatyn, bıýrokratııalyq kedergilerge ákeletin prosess kórinedi. Muny bastan keshken keıbir kásipker Palataǵa jetkizip, máseleni sheship berýdi suraǵan eken. Osydan keıin «Atameken» basshylyǵy Memleket basshysyna shyǵyp, bıznes sýbektilerin Ashyq jobasyn paıdalanatyndardyń qataryna qosý talaptaryn ońaılatýdy suraǵan.
«Atameken» UKP usynystaryn Memleket basshysy nazardan tys qaldyrmady. «Bul júıeniń operatory «Atameken» Ulttyq kásipkerler palatasy bolǵanyna qaramastan, obektilerdi tizimge qosý talaptaryn ońaılatýdy qaıta qaraý qajet. Memleket Ashyq jáne ózge de sıfrly quraldardy paıdalanatyn bıznes nysandaryn qoldaýǵa tıis. Ekinshi jaǵynan, mundaı monıtorıng sharalaryn elemeıtin kásipkerlerdi qatań jazalaý kerek. Bul másele ákimderdiń erekshe baqylaýynda bolýy kerek. Sonymen qatar sońǵy ýaqytta vırýs juqtyrǵandarmen baılanysta bolǵandar, ıaǵnı qoǵamdyq oryndarǵa baratyn «qyzyl» jáne «sary» mártebesi bar adamdar sany artyp jatyr», degen edi Prezıdent.
Sondaı-aq Memleket basshysy vırýsqa qarsy jappaı ımmýnıtet qalyptastyrýǵa kásipkerler de belsendi atsalysý kerektigin eskertti. «Vaksınalaý máselesinde otandyq bıznestiń ymyrashyldyq ustanymy óte mańyzdy. О́ıtkeni ujymdyq ımmýnıtetke qol jetkizbesteı bızneske qoıylǵan sanıtarlyq shekteý sharalaryn tolyǵymen alyp tastaý múmkin emes. Biz barlyq qural, sonyń ishinde áleýmettik jeliler arqyly vaksınanyń mańyzyn aıtyp, eldiń sanasyna senim uıalata bilýimiz kerek. Batystyń keıbir damyǵan elinde sendirý ádisteri májbúrleý sharalaryna aýysty. Tek iri eńbek ujymdarynyń qyzmetimen baılanysty erekshe jaǵdaılardy qospaǵanda, biz mundaı sharalardy qabyldamaımyz», dedi Prezıdent.