Búgin О́ńirlik kommýnıkasııalar qyzmeti alańynda sóz sóılegen Qazaqstannyń Profılaktıkalyq medısına akademııasynyń prezıdenti Almaz Sharman eldegi epıdemıologtardyń tapshylyǵyn rastady, dep jazady Egemen.kz.
A.Sharmannyń aıtýynsha, búgingi indet eldegi epıdemııanyń álsiz tustaryn kórsetti. Immýnolog qazirgi tańdaǵy kadr tapshylyǵyna baılanysty epıdemıologııalyq baqylaý máselelerin sheshý óte qıyn degen pikirde.
«Men 40 jyldyq tájirıbesi bar ımmýnologpyn jáne óz kezeńinde jumys istegen epıdemıolog pen vırýsologtardyń qandaı ekenin bilemin. О́kinishtisi sol, qazir kóbisi qyzmette emes. Qyzmettiń bul salasy óte mańyzdy. Sondyqtan biz jarty jyl buryn dárigerler tobymen densaýlyq saqtaý júıesin jańǵyrtý, buryn bolǵan gıgıena jáne epıdemıologııa mektebin qaıta qurý týraly úndeý tastadyq. Bul bolashaqta epıdemııa jaǵdaıynda epıdemıolog pen vırýsologtardyń myqty kadrlyq áleýetin qalyptastyrý úshin qajet. Alaıda, biz úshin bul sala búgin qajet. Sondyqtan qazirgi ýaqytta indet taralýyn jaqsy qadaǵalap, kásibı mamandarmen vırýsty jeńe alatyn epıdemıologtar daıarlanýda», dedi A. Sharman.
Ǵalym el aýmaǵynda buryn bolǵan áleýettiń joǵalǵanyn ókinishpen eske aldy. Biraq qazir ony qalpyna keltirýdiń erekshe múmkindigi bar. Bul úshin adam resýrstaryna qomaqty ınvestısııalar qajet.
«Medısınalyq ýnıversıtetterde epıdemıologııa jáne profılaktıkalyq medısına máselelerimen tikeleı aınalysatyn qoǵamdyq densaýlyq saqtaý mektepterin qaıta qurý qajet. Bul óte mańyzdy: biz aýrýlardyń aldyn alýǵa neǵurlym kóp ınvestısııa salsaq, adamdar soǵurlym az aýyrady jáne emdeýge az qarjy jumsalady», dedi A. Sharman.