Elimizdiń qorjynyna alǵashqy medaldy dzıýdoshy Eldos Smetov saldy. Osy oraıda Qazaqstan Prezıdenti janyndaǵy Ortalyq kommýnıkasııalar qyzmeti alańynda Nur-Sultan men Tokıo arasynda tikeleı beınekonferensııa baılanysy arqyly jalǵaǵan brıfıng ótti. Oǵan Qazaqstan Ulttyq Olımpıada komıtetiniń bas hatshysy Andreı Krıýkov, dzıýdodan Qazaqstan erler quramasynyń bas jattyqtyrýshysy Ǵalymjan Jylgeldıev jáne Tokıo Olımpıadasynyń qola júldegeri Eldos Smetov qatysty.
«Eldos óziniń naǵyz kásibı sportshy, has sheber ekenin taǵy bir ret dáleldedi. Jartylaı fınaldaǵy beldesý fınaldyq jekpe-jek dárejesinde ótti. Jartylaı fınaldyń óte qıyn bolǵanyna qaramastan, Eldos sońyna deıin jan aıamaı kúresti. Eldostyń júldesi qalǵan barlyq sportshylarymyzǵa jol ashyp, shabyt beredi dep senemiz», degen A.Krıýkov qazirgideı jaǵdaıda sportshylardyń densaýlyǵy men qaýipsizdigi mańyzdy ekenin alǵa tartty. Onyń aıtýynsha, Olımpıada qalashyǵynda qazaqstandyq delegasııanyń 120-ǵa jýyq múshesi bar. Olardyń jaǵdaıy jaqsy. Sportshylarymyz qaýipsizdik sharalary men talaptaryn oryndap, táýlik boıy dáriger, fızıoterapevt, psıholog mamandarynyń jiti baqylaýynda.
Dzıýdodan Qazaqstan erler quramasynyń bas jattyqtyrýshysy Ǵalymjan Jylgeldıev Eldostyń bul Olımpıadadaǵy maqsaty altyn medal bolǵanyn alǵa tartty. «Degenmen, E.Smetovten basqa synǵa túsetin sportshylar bar. Olar da bizdi qýantyp, qorjynymyzǵa altyn medal salady dep senemiz», dedi bas jattyqtyrýshy.
О́z kezeginde Eldos Smetov pandemııa jaǵdaıynda jarystyń kórermensiz ótýi, trıbýnalardan jankúıerlerdiń qoldaýy men daýysyn estı almaý sportshylarǵa keri áserin tıgizgenin aıtty. Soǵan qaramastan, bul saıysta 100 paıyz barymdy saldym dedi sportshy.
«Bul meniń ekinshi Olımpıadam. Osy joly bapkerlerimmen birge birinshi Olımpıadada buıyrmaı qalǵan altyn úshin kúresken bolatynbyz. Biraq buıyrǵany qola medal boldy. Qolymnan kelgenniń barlyǵyn jasadym. Qýanyshtymyn. Sebebi qola medalmen bolsa da elimniń baıraǵyn jelbiretý men úshin úlken mártebe», dedi E.Smetov.