Zerendi aýdanyna qarasty Shaǵalaly aýylyndaǵy №507 ýchaskege aýyl ákimdiginen úmitker retinde Bolat Dúısenov, Qaırat Baıdýlın, Murat Nursáýle tirkelgen eken. Bolat Dúısenov buǵan deıin osy okrýgtiń ákimi qyzmetin atqarǵan.
Saılaý ýchaskesi aýyldaǵy aýyl sharýashylyǵy kolledjiniń ǵımaratyna ornalasqan. Birinshi qabattaǵy keń de jaryq, kelimdi-ketimdi kisilerdiń daýys berýine qolaıly bólmede saılaý komıssııasynyń tóraǵasy Nurlan Kárimovty jolyqtyrdyq. Saǵat onǵa deıin 646 saılaýshynyń 59-y daýys beripti.
– Saılaýshylardyń belsendiligi tómen emes pe? – dep suradyq biz.
– Aýyl adamdary maldaryn jaılap, qoıyn qosyp, sıyryn saýyp bir-aq keledi, – dedi saılaý komıssııasynyń tóraǵasy.
Ýchaskede 95 jastaǵy Gennadıı Malahov esimdi qart adamdy jolyqtyrdyq.
– El Prezıdentiniń osy bastamasy kóńilge qonymdy, – deıdi Gennadıı Ivanovıch. – Keńes zamanynda sovhoz-tehnıkým bolyp turǵan kezimizde jumyssyz júrgen bir adamdy taba almaýshy edik, qazir jastardyń kóbi qol qýsyryp qarap otyr. Jumyssyzdyqtyń áserinen keleńsiz oqıǵalar da bolyp jatady. El saılaǵan ákim aldymen osy máselege kóńil bólse der edim.
Saılaý ýchaskesine tirkelgen 24 adam densaýlyqtaryna baılanysty úılerinde daýys bermekshi. Rasynda da saılaýshylar legi saǵat onnan asa kóbeıe bastady. Solardyń biri – Marat Omarovtyń aıtýyna qaraǵanda, okrýgtegi eń basty másele – jaıylym men shabyndyq. Tórt túliktiń súmesimen kún kórip otyrǵan halyqqa osyndaı túıindi máselelerdiń sheshilgeni kerek.
№506 saılaý komıssııasy aýyldaǵy orta mektepke ornalasypty. Munda 692 saılaýshy tirkelgen, 7 adam úıinde daýys beredi. Saǵat onnan asa elý adamnyń daýys bergendigi belgili boldy.
–Bizdiń saılaýshylarymyz alysta turady. Máselen, ózenniń arǵy betindegi Nurlykósh úsh shaqyrym jerde, Sovet kóshesiniń shetindegi aýmaq ta osy ýchaskege tirkelgen. Ol úıler de birshama qashyqta. Saılaýshylar sondyqtan bógelip jatqan bolýy múmkin, – deıdi saılaý komıssııasynyń tóraǵasy Býlat Bımaǵambetov. – Halyqtyń bári kúni buryn qulaqtandyrylǵan.
Mundaǵy saılaýshylarmen de júzdesip, aýyldaǵy sheshimin tappaǵan ótkir máseleler týraly surap bildik. Osy okrýg turǵyny Shaızada Nurbolattyń aıtýynsha, turǵyndardy jer jáne jol máselesi tolǵandyrady. Halqy qalap saılaǵan okrýgtiń jańa ákimi osy máselelerdi ońynan sheship berse, aýyldyń aıdarynan jel eseri anyq.
Jurt ózderi saılaǵan ákimniń jaýapkershilikpen jumys isteıtindigine senimdi. Jalǵyz Shaǵalaly aýylynda ǵana emes, oblystyń 95 saılaý okrýgine 318 kandıdat usynylyp, úmit oty laýlap tur.
Oblystaǵy saılaý ýchaskelerinde 436 baıqaýshy jumys isteýde. Baıqaýshylardyń oblystyq shtabynyń jetekshisi Erlan Zakırıanovtyń aıtýynsha, saǵat 11-ge deıin 20385 saılaýshy daýys berip úlgergen. Bul barlyq saılaýshylardyń 20,12 paıyzy.
– Biz árbir saǵat saıyn baıqaýshylardan aqparat alyp otyrmyz. Tutastaı alǵanda, naýqan zań sheńberinde ótkizilýde, – deıdi Erlan Zakırıanov.
Tuńǵysh ret uıymdastyrylǵan saıası naýqannan jurt úlken úmit kútip otyr. О́zderi saılaǵan ákimder jergilikti jerlerdiń uzaq ýaqyttan beri qordalanyp qalǵan máselelerin sheship berse, el besigi – aýyldyń ajary kirip qalmaq. El úmiti aqtalsa ıgi.
Aqmola oblysy