Memleket basshysy Qasym-Jomart Toqaevtyń byltyrǵy halyqqa Joldaýynda bergen tapsyrmasyna sáıkes elimizde alǵash ret aýyl ákimderiniń saılaýy ótti. Keshe Shyǵys Qazaqstan oblysynda 300-den astam baıqaýshy baqylaýda ustady. Basty maqsat – saılaý úderisiniń ashyq, taza jáne zań aıasynda ótýin qadaǵalaý boldy.
Baıqaýshylar bul jumysty asqan yntamen atqardy dep oılaımyn. Olaı deıtinim, aýyldyń erteńgi ómiri, ál-aýqaty búgingi saılanǵan úmitkerdiń jumysyna, iskerligine, tájirıbesine baılanysty bolmaq. Osy saılaý bir jaǵynan ákimderdiń halyq aldyndaǵy jaýapkershiligin arttyrsa, ekinshi jaǵynan halyqtyń qoǵamdaǵy máselelerge aralasyp, belsendi bolýyna jol ashady.
Baıqaýshylar arnaýly oqytýdan ótip, zań normalarymen, múmkin bolatyn jaǵdaılarmen tanysty. Olardy saılaý salasynda 15 jyldan astam tájirıbesi bar mamandar daıarlady. Aıta keterligi, baıqaýshylardy neǵurlym jergilikti turǵyndar arasynan tarttyq. Olar búgin baıqaýshy bolǵanymen, erteń sol aýylda qarapaıym turǵyn retinde ómir súredi. Sondyqtan saılaýdyń burmalaýsyz ótýine múddeli boldy.
Olardyń aıtýyna qaraǵanda, bári zańǵa sáıkes ótti. Sanıtarlyq normalar saqtalǵan, komıssııa músheleri óz jumystaryn durys atqardy. Eshqandaı zańbuzýshylyq tirkelgen joq.
Aıaýjan ÁShIMOVA,
«Partııalyq emes baıqaý ortalyǵy» respýblıkalyq qoǵamdyq birlestigi oblystyq fılıalanyń tóraǵasy
Shyǵys Qazaqstan oblysy