Reseıdiń Sochı qalasynda shahmattan áıelder arasynda ótip jatqan álem kýbogy jolyndaǵy jarystyń shırek fınaldyq saıystarynyń alǵashqy nátıjeleri belgili boldy, dep habarlaıdy Egemen.kz.
Bul mejede Dınara Sádýaqasova Reseı birinshiligi men kóptegen asa iri halyqaralyq jarystardyń birneshe dúrkin jeńimpazy, komandalyq eseptegi dúnıejúzi jáne qurlyq chempıony, byltyr «Úmitkerler týrnırinde» top jaryp, álemdik táj úshin talasqan áıgili Aleksandra Gorıachkınamen sheberlik baıqasýda.
Búgingi tańda FIDE reıtınginde ekinshi oryndy ıelenip otyrǵan 22 jastaǵy orys qyzy birinshi partııany aq fıgýralarmen oınady. Alǵashynda Aleksandra qarsylasyn biraz qyspaqqa aldy. Alaıda salqynqandylyq tanytqan Sádýaqasova qaýipti jaǵdaıdan ońaı qutyldy. Osylaısha, ol osy jarystyń basty favorıtteriniń birimen upaı bólisti.
Sondaı-aq, Nana Dzagnıdze (Grýzııa) men Anna Mýzychýk (Ýkraına) jáne Tan Chjýnı (Qytaı) men Ekaterına Lagno (Reseı) arasyndaǵy básekelerde de teń esep tirkeldi. Al reseılik Aleksandra Kostenıýk óziniń otandasy Valentına Gýnınadan basym tústi.
Sochıdegi jarysta erler de óner kórsetýde. Bul kúnderi olar 1/8 fınaldyq mejede kúsh synasýda. Sol sańlaqtar arasyndaǵy saıystardyń qandaı nátıjemen aıaqtalǵany jaıynda gazetimizdiń kelesi sandarynyń birinde baıandaıtyn bolamyz.