Ulttyq banktiń aqsha-kredıt saıasaty jónindegi komıteti bazalyq mólsherlemeni jyldyq 9,25% deńgeıinde belgileý týraly sheshim qabyldady, dep jazady Egemen.kz.
Mólsherlemeni kóterýdegi basty sebep - ınflıasııanyń ósýine jol bermeý. Bul týraly QR Ulttyq banki tóraǵasynyń orynbasary Aqyljan Baımaǵambetov QazAqparat tilshisine bergen eksklıýzıvti suhbatynda málim etti.
«Ulttyq banktiń negizgi mindeti – eldegi baǵa turaqtylyǵyn saqtaý jáne bizdiń basty quralymyz – bazalyq mólsherleme. Ony kóterý – maýsym aıynda 7,9% rekordtyq kórsetkishke jetken qazirgi ınflıasııanyń qarqyn alýyna oraı qabyldanǵan qısyndy jaýap boldy der edim jáne ınflıasııany 2022 jyly 4-6%-dyq maqsatty dıapazonǵa deıin tómendetý qajettiligi boldy», dedi A.Baımaǵambetov.
Onyń aıtýynsha, ınflıasııanyń ósýi jergilikti qubylys. Sońǵy aılarda asa joǵary ınflıasııanyń yqpaly búkil álem boıynsha sezildi.
«Qazaqstandaǵy ınflıasııanyń ósýi ýaqytsha, sondaı-aq ornyqty ishki jáne syrtqy faktorlardyń teris yqpalynan týyndady. Osy jaǵdaıda Ulttyq bank ınflıasııa qysymyn tómendetý úshin bazalyq mólsherlemeni kóterdi», dep túsindirdi ol.