Qostanaı oblysynda «1000 otbasylyq ferma» dep atalatyn erekshe joba bastaldy. Mal basyn kóbeıte otyryp, aýyl turǵyndarynyń ál-aýqatyn arttyrýdy kózdeıtin ıgi bastama alǵash ret Meńdiqara aýdanynda qanatqaqty joba retinde qolǵa alynyp otyr. Buǵan Molodejnyı aýylynan – eki, Býdenov eldi mekeninen – bir, aýdan ortalyǵy Borovskoıdan tórt otbasy qatysýda.
Oblystaǵy alpaýyt kompanııa – «Olja Agro» holdıngi jobaǵa qatysýshylardyń árqaısynyń aldyna 100 bas iri qaradan salyp berip otyr. Agroholdıng munyń syrtynda, otbasylyq shaǵyn fermalarǵa jyly qora-jaı, jaıly jaıylym berip, veterınarlyq kómek kórsetedi. «Olja Agro» ár otbasy qysqy mal azyǵyn daıarlap alý úshin jalǵa tehnıka berý, olardy kásipke oqytý, sharýashylyqqa, quqyqtyq salaǵa qatysty turaqty túrde keńes berip otyrý sııaqty mindetterdi de óz moınyna alǵan.
– Shyntýaıtyna kelgende, biz óz kásibimizdiń bir bólshegin aýtsorsıngke berip otyrmyz. Bul bárimizge de tıimdi. Jańa joba óńirdegi kásipkerlik pen mal sharýashylyǵyn damytýǵa kúshti serpin beretinine senimdimin. Onyń ústine jalpy óńirlik ónimniń kólemi ósedi, jergilikti bıýdjetterge salyq túsimi eselenedi, jańa jumys oryndary paıda bolady, eksport áleýeti artady, aýyldyń ınfraqurylymy damıdy. Kelisimshartqa otyrǵan kásipkerler bizben jyl saıyn alǵan tóliniń bir bóligi esebinen 7 jyl ishinde esep aıyrysady. Jeti jyl ótken soń sharýashylyqtaǵy búkil qora-jaı men mal basy kásipkerdiń óz ıeligine ótedi. Taraptardyń tabysyna qatysty barlyq sıfrlardy eseptep, pysyqtap qoıdyq. Bul jerde eshkim utylmaıdy, – dedi agroholdıng basshysy Aıdarbek Qojanazarov.
Qanatqaqty jobaǵa Býdenov aýylynda turatyn Sergeı Shtoma da qatysyp jatyr. Búginde «Býdenovskoe» dep atalatyn jeke sharýa qojalyǵyn ashyp, áıeli men bala-shaǵasyn bir fermanyń aınalasyna uıystyrǵan fermer atalmysh jobanyń aýyl turǵyndaryna bereri mol ekenin aıtady.
– Bul – aýyldy damytýǵa paıdasy tıetin, kerek joba. Osynyń arqasynda aýyl turǵyndary arasyndaǵy jumyssyzdyqty azaıtyp, jalpy oblystaǵy et jáne sút óniminiń kólemin ulǵaıtýǵa múmkindik týady. Eń bastysy aýyldy tastap ketip jatqandardyń legi tolastaıdy. Ekinshiden, aýyl turǵyndary az tabys tabady degen taptaýryn túsiniktiń joıylýyna yqpal etedi. Bizge qoıylyp otyrǵan talap onsha qıyn emes. Eń aldymen, maldy qyryp almaı, durystap baǵý kerek. Kelesi jyldan bastap tóldi ótkize bastaımyz, – dedi S.Shtoma.
Otbasylyq fermalar ósirgen tóldi laıyqty baǵamen holdıngtiń ózi satyp alyp otyrady. Iаǵnı fermerler ónimdi qaıda, kimge satamyz degen máselege bas qatyryp jatpaıdy. Jobanyń basty sharttarynyń biri – ár otbasy ózderine berilgen 100 bas sıyrdan meılinshe kóp tól alyp otyrýy tıis. Bul maqsatqa jetý úshin seriktestik shaǵyn fermalarǵa barlyq jaǵdaıdy jasap berip otyr. Tek qana ter tógip, adal eńbektený kerek. Munyń syrtynda agroholdıng ár fermerge 7 jyl boıy 350 myń teńge kóleminde aılyq tólep otyrady.
Molodejnyı aýylynyń turǵyny Janbolat Jumanazarov ta jubaıy Gúlim ekeýi osy jobaǵa qatysyp, jaqynda ǵana otbasylyq fermasyn ashqan. Jastaıynan eńbekke aralasyp, mal sharýashylyǵy salasynda mol tájirıbe jınaqtaǵan fermer: «Buǵan deıin jeke bıznesim bolǵan joq. Endi mal basyn kóbeıtip kásipkerlikpen aınalysýǵa múmkindik týyp otyr. Biz osy aýyldaǵy eki otbasyǵa ortaq bir ferma ashtyq. Bizge mal ósirýge arnalǵan úlken qora berilgen. Ony eki otbasy bólip aldyq. Qazir qoranyń ishi syrtyn sylaý, aqtaý jumystaryn júrgizip jatyrmyz», dedi.
Janbolattyń otbasyna berilgen úlken qoranyń ekinshi jaǵyn Kárimovter otbasy ıelik etipti. Erli-zaıypty Tókesh pen Jańagúldiń úıindegi úlken ul aldaǵy kúzde otan aldyndaǵy áskerı boryshyn ótep, aýylǵa oralmaq. Áke-sheshesiniń júz shaqty iri qara alyp, ferma ashqanyn estigen Bekarys áskerden oralǵan soń aýylda qalyp, osy fermadaǵy mal basyn kóbeıtýdi josparlap qoıypty.
– Biz agroholdıng mamandarymen aqyldasa otyryp, qazaqtyń aq bas sıyrlaryn aldyq. Bul asyl tuqymdy iri qara mol et beredi. Bizdiń jaqtaǵy qaqaǵan qystyń qytymyr aıazyna da myńq etpeıdi, ystyq-sýyqqa birdeı tózimdi bolyp keledi, – dedi T.Kárimov.
Jalpy aýmaǵy 180 myń gektar alqapty ıgerip otyrǵan alpaýyt kompanııa – «Olja-Agronyń» menshigindegi maldyń uzyn sany búginde 15 myńnyń ústine shyqqan. Agroholdıng jobaǵa qatysatyn otbasylardyń árqaısyna 100 sıyr, 4 ógiz, oǵan qosa osynshama maldy baǵyp-qaǵyp, kóbeıtýge qolaıly qora-jaı beredi.
«1000 otbasylyq ferma» jobasyna bıylsha holdıngke qarasty sharýashylyqtarda jumys istep júrgen otbasylar ǵana qatystyrylyp otyr. Jobaǵa aldaǵy jyldan bastap «Olja Agronyń» sharýashylyq qurylymdary ornalasqan 3 aýdanda turatyn ári mal baǵýdyń qyr-syryn jaqsy biletin kez kelgen otbasy qatysa alatyn bolady.
Qostanaı oblysy