Kóne zamanda qajet kezinde qoń etin kesip beretin kisilik týraly adam kókiregin ýyljytatyn áserli oqıǵalar aıtylýshy edi. Búginde de bar eken.
Dalanyń danalyǵyn boıyna sińirgen jurtymyzda rızashylyq ráýishpen aıtylatyn, «basyń aman, baýyryń bútin bolsyn» deıtin tilek bar. Baýyrdyń bútindigi densaýlyqtyń dińgegi bolǵan-aý shamasy. Bolat Muqanovtyń densaýlyǵynda kinárat bary osydan úsh jyl buryn belgili bolǵan. О́ziniń aıtýyna qaraǵanda, baýyry syzdaǵanmen, mán bermegen. «Aýrý mysqaldap kirip, batpandap shyǵady» demeı me, birte-birte aǵzadaǵy syrqat meńdeı bastaǵan. Endigi amal – ota jasaý. Biraq ol úshin donor kerek. Onyń qaıdan tabarsyń?! Aǵasynyń jaǵdaıyn estigen soń inisi Marat birden kelisimin beripti.
– Baýyrym emes pe, nar táýekel dedim. Qazir ekeýimizdiń de densaýlyǵymyz jaqsy. Bul isimdi erlik dep eseptemes edim. Týǵan aǵamnyń ómirin uzartqym keldi, – deıdi Marat Muqanov.
Kúrdeli ota Nur-Sultan qalasyndaǵy ulttyq onkologııa jáne transplantologııa ǵylymı ortalyǵynda jasalypty. Nebári 33 jastaǵy Marat óz densaýlyǵyna kinárat keletin bolsa da, baýyry úshin baýyryn qıǵan. Aıtýyna qaraǵanda, qııandaǵy Jarqaıyń aýdanynyń Úshqarasý aýylynda jaryq dúnıe esigin ashqan aǵaıyndylar ata-anasynan erte aıyrylyp, jetimdiktiń ashy dámin tatqan eken. Otbasyndaǵy alty balanyń úsheýi ómirden erte ozǵan.
– Qazaqstanda mundaı otalar keıingi kezde jasala bastady ǵoı. Úlken apaıym Rozaǵa osyndaı ota jasalǵanda dámi erte taýsylmas edi. О́kinish ózegimdi órteıdi, – deıdi Marat Amantaıuly.
Baýyrǵa degen qurmettiń, shynaıy syılastyq pen izettiliktiń belgisi tárizdi osy bir oqıǵanyń astarynda úlken mán jatyr. Bylaıǵy jurt bile júrsin dep qalam tarttyq biz de.
Aqmola oblysy,
Jarqaıyń aýdany