Qazaqstan mobıldi ınternet jyldamdyǵy boıynsha álemdik reıtıngte Reseı men Malaızııany basyp ozyp, bir aıdyń ishinde 5 satyǵa, al bir jylda 15 satyǵa kóterilip, 80-orynǵa taban tiredi.
Bir jylda eldegi mobıldi ınternet jyldamdyǵy 42% artqan, degen aqparat taratty Finprom.kz resýrsy. Mobıldi ınternettiń jyldamdyǵy 30,18 Mbıt/s-qa jetken. Byltyrǵy maýsym aıynda bul kórsetkish 21,25 Mbıt/s bolatyn, ıaǵnı jyldamdyqtyń artýy jylyna 42%-dy quraǵan. Osylaısha, ınternet baılanysynyń jyldamdyǵy tórt aı qatarynan qarqyndy ósken.
Jalpy, TMD elderiniń ishinde Qazaqstanda mobıldi ınternettiń jyldamdyǵy Reseı, Qyrǵyzstan, О́zbekstan, Belarýs, Tájikstanǵa qaraǵanda joǵary. Reıtıngte Malaızııa, Egıpet, Úndistan, Venesýela sııaqty elderde de mobıldi ınternettiń jyldamdyǵy Qazaqstannan tómen bolyp shyqqan.
Jalpy, álem boıynsha mobıldi ınternettiń ortasha jyldamdyǵy maýsym aıynda 55,34 Mbıt/s bolǵan. Eń jyldam ınternet BAÁ-da (193,51 Mbıt/s), odan keıin Ońtústik Koreıada (180,48 Mbıt/s) jáne Qatar (171,76 Mbıt/s) sııaqty elderde tirkelgen. Al reıtıngtiń eń tómengi satysynda Aýǵanstan tur, onda mobıldi ınternettiń qarqyny 7,37 Mbıt/s eken.
Bıylǵy 1 shildedegi málimet boıynsha Qazaqstanda 24,2 mln abonent bar. Bul byltyrǵy kórsetkishpen salystyrǵanda 1,2%-ǵa artyq. Onyń ishinde 15,8 mln abonenttiń ınterneti bar. Bul da ótken jylmen salystyrǵanda birden 7%-ǵa kóbeıgen. Al álemdik jelilerge kiretin múmkindigi bar abonentterdiń úlesi bıylǵy maýsymda 65,3%-ǵa deıin artqan, byltyr osy ýaqytta bul kórsetkish 61,8% bolǵan.
Búginde elimizde úsh uıaly baılanys operatory bar. Olardyń ishinde eń kóp abonenti bar Beeline bolyp shyqqan – 9,5 mln. Sodan keıingi orynda Kcell/Activ (8,1 mln abonent) jáne úshinshi Tele2/Altel (6,5 mln abonent).
2021 jyldyń alǵashqy 6 aıynda Beeline 1350 bazalyq stansa salyp, oǵan 120 eldi mekendi qosqan. Sóıtip aýyldyq jerdegi ınternet-trafık byltyrǵymen salystyrǵanda buryn-sońdy bolmaǵan rekordtyq kórsetkishpen ósken. Jalpy alǵanda elimiz boıynsha trafıkti tutyný kólemi 62%-ǵa artqany baıqalady.