Memleket basshysy Qasym-Jomart Toqaev saıası reformalar paketin usynyp, sonyń ishinde aýyl ákimderin tikeleı saılaý kerektigin aıtyp, naqty tapsyrma bergendigi qoǵamymyzda qyzý talqylanyp, keńinen qoldaý tapty. Al ótken jeksenbide bul demokratııalyq ózgeris naqty iske asyrylyp, elimizde aýyldyq okrýgterdiń ákimderin saılaý oıdaǵydaı ótti.
Aýyl ákimderin halyqtyń tikeleı saılaýy – ıgi bastama. Kezinde ata-babalarymyz da bıler men bolystardy ózderi saılaǵan. Halyq ishinen shyqqan tulǵa halyqshyl bolady. Zaman talabyna saı aýyl ákimderin saılaýdyń oń tájirıbesin qalyptastyrdyq dep oılaımyn jáne bul ózge Orta Azııa memleketterine de jaqsy úlgi bolatyny sózsiz.
Táýelsiz Qazaqstannyń jańa tarıhynda aýyl ákimderin halyqtyń ózi saılaýy – Konstıtýsııamyzda belgilengen demokratııalyq qaǵıdanyń aıqyn kórinisi. Halyq bul ınstıtýttyń áli de jaqsy jaqtaryn tolyq sezinbegen shyǵar, biraq bolashaqta ári qaraı damý barysynda aýyl turǵyndary osy saıası oqıǵanyń mán-mańyzyn qazirgiden de góri anyǵyraq túsinedi dep oılaımyn.
Jalpy, saılaý Jambyl oblysynda joǵary deńgeıde ótti deýge bolady. Sebebi saılaýshylardyń 90 paıyzynan astamy saılaýǵa qatysty. Saılaýǵa qatysý boıynsha belsendilikti Sarysý, Merki, Talas jáne Qordaı aýdandarynyń turǵyndary kórsetti. Basqa aýdandarda da saılaýǵa qatysý deńgeıi 84 pen 92 paıyz aralyǵynda boldy. Bul saılaýǵa «Partııalyq emes baıqaý ortalyǵy» respýblıkalyq qoǵamdyq birlestigi oblystyq fılıalynan 194 baıqaýshy jáne aýdandarda solarmen tyǵyz baılanysta jumys istegen 14 kapıtan daıarlandy. Olardyń bári de saılaý barysyna saılaý ýchaskelerinde kúni boıy baqylaý júrgizdi. Saılaý ýchaskeleri jabylǵannan keıin de komıssııa músheleri saılaýshylardyń daýystaryn sanap bolǵanǵa deıin sol jerde boldy.
Saıası naýqan barysynda óte belsendi qyzmet atqarǵan Moıynqum aýdanynan Ásel Sarybaeva, Talas aýdanynan Saltanat Mahmýt, T.Rysqulov aýdanynan Darııa Narmatova jáne Shý aýdanynan Ásel Qasenova sııaqty kapıtandardyń esimderin atap ótkim keledi. Barlyq baıqaýshy óz jumysyna jaýapkershilikpen qarap, saılaýdyń ádil ótýine óz úlesin qosty.
Al endi jańadan saılanǵan ákimderge halyq kóp úmit artyp otyr. Sebebi aýyldyq jerlerde, aýyl sharýashylyǵynda sheshimin kútken másele kóp. Árıne, aýyl ómiri birden ózgermeıtin shyǵar. Biraq eger saılanǵan ákimder qolyndaǵy resýrstardy tıimdi qoldana bilse, halyqtyń jaǵdaıy budan da jaqsarýy kerek.
Bul saılaý halyqtyń ózderiniń bılik júıesine naqty aralasa alatynyn, jeke turǵynnyń óz máselesin ózi sheshe alatynyn túsinýine yqpal etedi. Sonymen qatar bul úrdis tek qana aýyl ákimderin saılaýmen toqtap qalmaıdy. Ol bolashaqta aýdan ákimderin saılaýǵa ulasady. Munyń ózi bıliktiń ortalyqtan jergilikti jerge berilýin baıqatady. Bul, árıne, óz kezeginde jergilikti máselelerdiń ýaqytynda sheshilýine óz septigin tıgizetini anyq.
Asqar QADYRQULOV,
«Partııalyq emes baıqaý ortalyǵy» RQB oblystyq fılıalynyń tóraǵasy
Jambyl oblysy