Qazaqstandyq oqýshylar fızıka jáne lıngvıstıka pánderi boıynsha ótken halyqaralyq olımpıadalarda 6 medal jeńip aldy. Jas fızıkter qurama qorjynyna 5 kúmis, lıngvıster 1 qola medal saldy. Qatysýshylardy Bilim jáne ǵylym mınıstri Ashat Aımaǵambetov óziniń Facebook paraqshasynda quttyqtady.
Halyqaralyq fızıka olımpıadasy (IPhO-2021) 17-24 shilde aralyǵynda Lıtvada onlaın formatta ótti. Zııatkerlik baıqaýda álemniń 76 elinen 368 oqýshy baq synady. Qazaqstan atynan Nur-Sultan, Almaty, Atyraý jáne Pavlodar qalasynan bes oqýshy, ıaǵnı respýblıkalyq pándik olımpıadanyń jeńimpazdary qatysty. Ulttyq quramany jarysqa tájirıbeli pedagogter men jattyqtyrýshylar daıyndady.
Olımpıada eki kezeńnen turdy. Qatysýshylar fızıka páni boıynsha túrli teorııalyq jáne praktıkalyq tapsyrmalardy sheshti. О́tken jyldyń rekordyn jańartyp, qazaqstandyq oqýshylardyń barlyǵy kúmis medal ıegeri atandy. Olar – Raýan Qaldybaev, Anton Draganchýk, Dinmuhammed Rahymjanov, Rızabek Alpamys, Ersultan Pitebaı.
Halyqaralyq lıngvıstıka olımpıadasy (IOL-2021) Latvııada onlaın rejimde ótti. Oǵan Nur-Sultan, Shymkent, Taraz jáne Qaraǵandy qalalarynan tórt oqýshy qatysty. Qazaqstan qurama komandasy respýblıkalyq olımpıadanyń jeńimpazdarynan jasaqtaldy. Olar álemniń 30-dan asa eliniń qatysýshylarymen baq synasty.
Saıys eki kezeńnen turdy. Birinshi týrda qatysýshylar bes tapsyrmany sheship, ekinshi týrda komandalyq joba daıyndady. Olımpıada qorytyndysy boıynsha Qazaqstan quramasynyń qorjyny bir qola medalmen tolyqty. Ony elordalyq oqýshy Darıa Peresypkına ıelendi.
«Qurmetti olımpıada júldegerleri! Sizderdi jańa jeńisterińizben quttyqtaımyn! Qazaqstandyq oqýshylar myqty daıyndyǵyn, bilimderiniń joǵary deńgeıin taǵy da dáleldedi. Sizder óz qurdastaryńyzdyń arasynda fızıka jáne lıngvıstıka áleminde kóshbasshy bola aldyńyzdar. Osyndaı jetistikter qajyrly eńbektiń, shydamdylyq pen qaısarlyqtyń, birneshe jyldyq joǵary daıyndyqtyń nátıjesi ekeni anyq. Bolashaqta sizderdiń esimderińizdi otandyq ǵylym áleminde kóretinimizge úmit artamyz. Sizderge jańa jetistikter tileımin! Sondaı-aq olımpıadaǵa qatysqan oqýshylardyń ustazdaryn, ata-analaryn jáne jattyqtyrýshylaryn quttyqtaımyn. Jeńimpazdardyń joǵary nátıjelerge qol jetkizýi sizderdiń eńbekterińizdiń arqasy ekeni belgili. О́z kezeginde, Bilim jáne ǵylym mınıstrligi oqýshylarymyzdyń ǵylym álemin odan ári baǵyndyrýy men óz rekordtaryn jańartýy úshin jaǵdaı jasaýdy jalǵastyratynyn atap ótkim keledi», dep jazdy Bilim jáne ǵylym mınıstri Ashat Aımaǵambetov.
«Egemen-aqparat»