Nur-Sultannyń jabyq saýda oryndary ózge kásipkerlik nysandary sekildi «Ashyq» jobasyna qosylady. Bul koronavırýstyń taralý qaýpin azaıtýǵa, osylaısha qyzmetkerler men kelýshilerdi qorǵaýǵa jáne nysannyń qyzmetin jalǵastyrýǵa múmkindik beredi, dep habarlaıdy Egemen.kz.
Olardyń qatarynda, mysaly, «Ásem», «Álem» saýda ortalyqtary, «Etalon» qurylys bazary bar, sondaı-aq «Shapaǵat», «Saryarqa» jáne ózge de saýda oryndary jobaǵa daıyndalýda.
Búginde elordada «Ashyq» jobasynda 2 200-den astam kásipkerlik sýbektisi tirkelgen. Jobaǵa qatysatyn kásipkerler qatysý sharttaryn saqtaýy tıis: statýsyn anyqtaǵannan keıin ǵana kelýshilerdi ishke jiberýi tıis. Al monıtorıngtik toptar nysandardyń sanıtarlyq normalardy jáne shekteý sharalaryn saqtaǵanyn júıeli túrde tekserip turady.
Sonymen qatar, «Ashyq» jobasynyń arqasynda 18 turǵyn «qyzyl statýsy» (PTR synamasy oń nátıje kórsetti) bola tura qoǵamdyq oryndarǵa barýǵa tyrysqany úshin ákimshilik jaýapkershilikke tartyldy. Osylaısha, kásipkerler «Ashyq» jobasynyń mańyzdylyǵyn atap ótti.
«Biz kesheden beri «Ashyq» baǵdarlamasy boıynsha jumys istep kelemiz. Jurtshylyq arnaıy ornatylǵan tártip boıynsha kiredi. Kirberiste jınalyp turmaıdy. Búginniń ózinde kelýshiler arasynda 2 sary,1 qyzyl statýsy bar adamdar anyqtaldy. О́z tájirıbemizde mundaı úlken nysanda da osy júıe boıynsha jumys isteýge bolatynyn kórsetkimiz keledi. Nysan qyzmetkerleri de, kelýshiler de ózin qaýipsiz sezinýi úshin osy júıeni ornatqanyn qalaımyz», dedi «Ásem» SO dırektory Nurlan Nurmaǵanbetov.
Vedomstvoaralyq komıssııanyń sheshimine sáıkes osy jyldyń 2 tamyzynan bastap «Ashyq» jobasyna qatyspaıtyn kásiporyndar men uıymdardyń qyzmeti toqtatylatyn bolady. Bul tártip ortalyq memlekettik organdarǵa, ákimdikterge, quqyq qorǵaý organdaryna, densaýlyq saqtaý uıymdaryna, BAQ-qa, azyq-túlik dúkenderine, dárihanalarǵa jáne tirshilikti qamtamasyz etý uıymdaryna qoldanylmaıdy.