Memleket basshysy Qasym-Jomart Toqaevtyń bastamasymen qolǵa alynǵan saıası reformalar aıasynda ótken aýdandyq mańyzy bar qalalar, aýyldar, kentter men aýyldyq okrýgter ákimderiniń alǵashqy tikeleı saılaýynyń qorytyndysy boıynsha Nur Otan partııasynyń kandıdattary jáne ózin ózi usynýshy partııa músheleri okrýgterdiń 86 paıyzdan astamynda jeńiske jetti.
Oblystyq saılaý komıssııalary jarııalaǵan málimetter boıynsha, Nur Otan partııasynyń músheleri bolyp sanalatyn 627 kandıdat ákim bolyp saılandy, onyń 65-i – ózin ózi usynǵan nurotandyqtar.
Partııanyń baspasóz qyzmeti habarlaǵandaı, úgit-nasıhat kezeńinde Nur Otan kandıdattary 1,2 mln saılaýshyny qamtyǵan 45 myńnan astam kezdesý men is-shara ótkizgen. Olardyń úshten bir bóligi onlaın formatta bolsa, qalǵandary sanıtarlyq talaptardy saqtaı otyryp júzege asyrylǵan. Saılaýaldy úgit naýqany barysynda partııanyń qoǵamdyq qabyldaý bólmelerine 1,5 myń ótinish kelip túsip, olar jergilikti jerlerde jedel sheshilgen.
Jeńiske jetken nurotandyqtardyń 35 paıyzdan astamy – jańa saılanǵandar. Olardyń arasynda bilim berý salasynyń ókilderi, kásipkerler, fermerler bar. Saılanǵan ákimderdiń 65 paıyzy – osy qyzmetti abyroımen atqaryp, halyq qaıtadan senim kórsetken tulǵalar. Kandıdattardyń ortasha jasy – 46 jasty qurady. Áıelderdiń úlesi – 11,5 paıyz. 35 jasqa deıingi jastar – 14,2 paıyz. Jeńiske jetken nurotandyqtardyń kópshiligi – bastaýysh partııa uıymdarynyń tóraǵalary jáne taıaýda ótken partııaishilik praımerızge qatysýshylar.
Barlyq kandıdat buǵan deıin partııanyń Saıası menedjment mektebi bazasynda semınarlardan ótip, qajetti uıymdastyrýshylyq, ádistemelik jáne basqa da qoldaýmen qamtamasyz etilgen. Árqaısysynyń tıisti aýmaqtyń múmkindigin eskere otyryp, partııanyń qoldaýy arqyly qajetti resýrstarmen qamtamasyz etilgen saılaýaldy baǵdarlamasy boldy. Bul olardyń sózi men isiniń alshaqtyǵyn boldyrmaýǵa múmkindik beredi.
«Partııamyzdyń Lıderi Nursultan Nazarbaev aıtqandaı, nurotandyqtardyń basty qaǵıdattary – jaýapkershilik, komandalyq rýh, partııa ıdealdary men qundylyqtaryna beriktik. Nur Otan-nyń mindeti – tek saılaýda jeńiske jetý ǵana emes, aýyldardyń damýyna júıeli jaǵdaı jasaý, azamattardyń naqty máselelerin sheshý. Partııa óz kandıdattaryn usyna otyryp, birinshi býyn ákimderdiń el Prezıdenti Qasym-Jomart Toqaev usynǵan «Halyq únine qulaq asatyn memleket» tujyrymdamasy aıasynda halyqpen ózara árekettestiktiń jańa mádenıetin qalyptastyra otyryp, zamanaýı tásilderdi engizý ústinde», dep atap aıtty partııa Tóraǵasynyń birinshi orynbasary Baýyrjan Baıbek Facebook-tegi paraqshasynda.