Soltústik jáne Ońtústik Koreıa ótken jyldyń maýsym aıynda Phenıan óshirgen senim telefonyn bir jyldan keıin qalpyna keltirdi.
Ońtústik Koreıa prezıdenti ákimshiliginiń málimetinshe, eki eldiń basshylary senimdi qalpyna keltirýge jáne qarym-qatynasty jaqsartýǵa kelisken. Habarlamada sondaı-aq olardyń sáýir aıynan beri birneshe hat almasqany aıtylǵan.
Eki el arasyndaǵy sátsiz sammıtten keıin qarym-qatynas nasharlap, Soltústik Koreıa 2020 jyldyń maýsymynda senim telefonyn óshirgen-di. Kóp uzamaı Soltústik Koreıa baılanysty jaqsartý úshin salynǵan ortadaǵy shekara keńsesin jaryp jibergen.
«El basshylary arasyndaǵy kelisimge sáıkes Soltústik pen Ońtústik Koreıa 27 shildede saǵat 10:00-den bastap, koreıaralyq baılanys jelileriniń jumysyn qalpyna keltirý boıynsha sharalar qabyldady», delingen habarlamada.
Ońtústik Koreıanyń Biriktirý mınıstrliginiń málimetinshe, eki taraptyń ókilderi úsh mınýt boıy telefonmen sóılesken. Mınıstrlik taǵy bir qońyraý seısenbi kúni tústen keıin jáne kún saıyn bolatynyn jetkizdi.
Eki el arasyndaǵy baılanys 2018 jyly Ońtústik Koreıa prezıdenti Mýn Chje In men Soltústik Koreıa kóshbasshysy Kım Chen Yn úsh ret kezdesken kezde jaqsara túsken. Keıinnen Kım Chen Yn men sol kezdegi AQSh prezıdenti Donald Tramp arasyndaǵy ekinshi sammıt sátsiz ótkennen keıin aradaǵy baılanys buzyla bastaǵan. Ońtústikte shekara arqyly úgit-nasıhat taratqan toptar anyqtalǵannan keıin qarym-qatynas tipti ýshyǵa túsken. Sonyń saldarynan Soltústik Koreıa barlyq áskerı jáne saıası baılanys arnalaryn, sonyń ishinde el basshylary arasyndaǵy senim telefonyn óshirip tastaǵan bolatyn.