Búginde Jambyl oblysynda «Asarlatyp úı salý» jobasy júzege asýda. Osy ýaqytqa deıin qaıyrymdy jandardyń kómegimen óńirde júzdegen otbasy baspanaly bolyp, qonystoıyn toılady.
Atalǵan joba aıasynda jýyrda T.Rysqulov aýdany Lýgovoı aýylynyń turǵyny Darııa Tólendıevaǵa baspana kilti tabys etildi. Erekshe bala tárbıelep otyrǵan ana kópshiliktiń bul yqylasyna alǵysyn jaýdyryp jatyr.
Bul turǵyn úıdiń qurylysyna erikti jastardyń bastamasymen qurylǵan «Jan jylýy» qaıyrymdylyq qorymen qatar, jergilikti kásipkerler, sharýa qojalyqtarynyń basshylary jáne qarapaıym aýyl turǵyndary da úles qosty. Baspana kiltin aýdandyq ardagerler keńesiniń tóraǵasy Qojaıhan Bıjanov ıesine tapsyryp, «Birlik bar jerde tirlik bar» ekenin atap ótti. Sonymen qatar asarlatyp úı salýǵa atsalysqan eriktiler men barsha azamattarǵa alǵys aıtty. Sondaı-aq osy ıgi iske bastamashy bolǵan barsha azamatty aýdan ákimi Erbolat Sadyrqulov Alǵys hattarmen marapattady.
Jańa baspananyń qurylysy úsh aıda aıaqtalyp, oǵan 5 mıllıon teńgege jýyq qarajat jumsalǵan. Qaıyrymdy jandardyń demeýshilik kórsetýimen jáne qol kómegin berýimen júzege asqan bul joba aldaǵy ýaqytta óz jalǵasyn tabady.
Aıta keteıik «Asarlatyp úı salý» jobasy boıynsha aýdanda ótken jyly 16 úı salý josparlanǵan bolsa, búginde onyń 14-i salynǵan. Sonymen qatar jergilikti ákimdiktiń bastamasymen 2 daıyn úı satyp alynyp, muqtaj otbasylarǵa tapsyrylǵan. Bıyl taǵy da 15 úıdiń qurylysy júrgizilýde. Atalǵan turǵyn úılerdiń de qurylysy aıaqtalysymen muqtaj azamattarǵa beriledi.
Jambyl oblysy