Syrtqy ister mınıstrligi «Pýsan qalasynda (Koreıa Respýblıkasy) Qazaqstan Respýblıkasynyń Bas konsýldyǵyn ashý týraly» QR Prezıdenti Jarlyǵynyń jobasyn daıyndady, dep habarlaıdy Egemen.kz.
Qujatta «Pýsan qalasynda (Koreıa Respýblıkasy) Qazaqstan Respýblıkasynyń Bas konsýldyǵynyń ashylýy, birinshi kezekte, Qazaqstan Respýblıkasynyń konsýldyq qyzmetiniń osy saladaǵy qyzmetin kúsheıtedi, sonymen qatar saýda-ekonomıkalyq jáne ınvestısııalyq yntymaqtastyq (qazaqstandyq eksportty jyljytý, ınvestısııalardy tartý jáne birlesken kásiporyndar qurý) salasyndaǵy jumystardy júıeli túrde qurýǵa múmkindik beredi», dep jazylǵan.
Konsýldyq mekemeni ashýǵa baılanysty is-sharalar «Syrtqy saıası qyzmetti úılestirý jónindegi qyzmetter» bıýdjettik baǵdarlamasy boıynsha Qazaqstan Respýblıkasy Syrtqy ister mınıstrligine bólingen aqsha qarajaty sheginde júzege asyrylatyn bolady.
Jarlyq jobasy «Ashyq NQA» veb-saıtynda 12 tamyzǵa deıin qoǵamdyq talqylaýǵa ornalastyryldy.