Sporttyq gımnastıkadan jalǵyz ózi jeti joldama jeńip alǵan Mılad Karımı Olımpıadanyń irikteý synynda úsh jattyǵý boıynsha fınalǵa ótken bolatyn. Burnaǵy kúni kópsaıystyń aqtyq saıysynda synǵa túskenimen, júldegerler qatarynan kórine almady.
Júldege jaqyndaý kórsetkishti Mılad kermedegi jattyǵý boıynsha tirkedi. Irikteýde 14,766 upaı jınaǵan ol jalpy esepte ekinshi oryn alǵan edi. Dál osy jattyǵýdan Mıladtan medal kútemiz.
Buǵan deıin Azııa, álem chempıonatynda synǵa túskenimen, jurt kózine túse qoımaǵan Mılad táýir nátıjege tek 2019 jyldan bastap jete bastady. 2019 jyly Italııanyń Neapol qalasynda ótken jazǵy Ýnıversıadada kúmis medal jeńip aldy. 2020 jylǵy gımnastıkadan álem kýbogynyń serııasy aıasynda Aýstralııanyń Melbýrn qalasynda ótken erkin jattyǵýda qola medalǵa ıe boldy.
«Olımpıadaǵa deıin Kıevte jattyǵý jasadyq. Olımpıadaǵa qatysý bala kezdegi armanym edi. Sol armanǵa jetý ońaı bolǵan joq. Kúsh-jigerimdi salyp júrip maqsatyma qol jetkizdim. Endi qaıtkende de Tokıoda táýir nátıje kórsetsem deımin», dedi M.Karımı.
Olımpıada bastalǵaly beri barlyq sportshyǵa senim artyp, «medal alady degen senim artamyz» jazyp jatyrmyz ǵoı. Alaıda úmitimiz aqtalmaı, sportshylarymyz qoǵadaı japyrylyp jeńilip jatyr. Mılad Karımıge qatysty maqalamyzdyń taqyrybyn suraqpen qoıyp otyrǵanymyzdyń jóni osyndaı. Kermedegi jattyǵý boıynsha Karımı kók týymyzdy jelbiretip jatsa, qýanyshtyń kókesi sol bolar edi!