Aǵa leıtenant Ardana Botaı Sý-30SM kópfýnksıonaldy joıǵyshynyń ekıpaj komandıri retinde alǵashqy jeke ushýyn oryndady, dep habarlady Qorǵanys mınıstrliginiń baspasóz qyzmeti.
Elimizdiń Qarýly Kúshteri Áýe qorǵanysy kúshteriniń bas qolbasshysy avıasııa general-leıtenanty Nurlan Ormanbetov derbes ushýǵa ruqsat beretin praktıkalyq emtıhandy qabyldady.
– Qazaqstan Respýblıkasy Qarýly Kúshteriniń tarıhynda Sý-30SM jaýyngerlik ushaǵynda ekıpaj komandıri retinde derbes ushýdy alǵash ret áıel adam oryndady. Onyń buǵan jaqsy daıyndalǵanyn, kók aspandy baǵyndyrýǵa degen umtylysyn, joıǵysh ushqysh retinde memleketimizdiń áýe shebin kúzetýdegi mindetterdi oryndap júrgenin atap ótken jón. Ol jaýyngerlik avıasııadaǵy áıelderdiń erlermen teń dárejede kúrdeli mindetterdi oryndaı alatynyn dáleldedi, – dedi avıasııa general-leıtenanty Nurlan Ormanbetov.
Qazaqstandaǵy áskerı avıasııanyń jalǵyz áıel ushqyshy Qaraǵandy avıabazasynda qyzmet etedi. Birneshe aı boıy Ardana Taldyqorǵan qalasyndaǵy avıasııa bazasynda arnaıy oqýdan ótti.
– Sý-30SM ushaǵymen jeke ushý – men úshin kásibı turǵyda qalyptasýǵa jasaǵan úlken qadam. Aldaǵy maqsatym – ushý tehnıkasyn jaqsartý jáne jer ústindegi, áýedegi maqsattarǵa jáne toptyq ushýlardaǵy jaýyngerlik qoldanýǵa ruqsat alý úshin ári qaraı daıarlyq baǵdarlamasy boıynsha mashyqtaný daǵdylaryn pysyqtaý, – dep Ardana Botaı bolashaqqa arnalǵan josparyn bólisti.
Atalǵan Sý-30SM – kópfýnksııaly 4++ býyndy joıǵysh ushaq. Ol kez kelgen aýa raıy jaǵdaıynda, kúndiz-túni áreket etýge qabiletti. Áýe barlaýyn júrgizýge, áýede, jer ústinde jáne teńizde nysandardy joıýǵa arnalǵan.
Joǵary manevrli joıǵysh ushaqpen ushýǵa ruqsat alý úshin ushqysh birneshe aı boıy teorııalyq bilim alyp, arnaıy Sý-30SM trenajerinde jattyǵady, shtýrman retinde ushady. Kóptegen synaq pen emtıhandy sátti tapsyrǵan soń ǵana táýelsiz ushýǵa ruqsat alady. Ardana Botaı sondaı synnyń bárinen súrinbeı ótip, aldyna qoıǵan maqsatyn tabandylyqpen oryndaı bildi.