Izgilik uıalaǵan Sandyqtaý

Kóp kóńilin demdeıtin kóp-kórim janashyrlyq týraly qu­laqtanǵan qaýym ózderi de qarap otyrmaı, qolda bary­men bólisip, birin-biri qı­yn shaqta qoltyǵynan demep, bir­liktiń tinin bekemdeı tús­ken. Aýdandaǵy barlyq aýyldyq okrýg­te jaǵdaıǵa túsi­nis­tikpen qarap, kópbalaly ot­basylar men jalǵyzilikti jan­darǵa demeý bolýda. Atymtaı jomarttardyń aq nıetinen týyn­daǵan júrek tebirenter qam­qorlyqtyń shapaǵatyna bólen­gender ózderiniń eshýaqytta ıyqtaryna túsken qıyndyqty jalǵyz kótermeıtinin sezinip, eńsesin tikteı túsken. Negizinde birin-biri qoldap, kóp bolyp ju­mylyp jatqan jumysty ár­bir aýyldyq okrýgtegi jastarmen jumys isteıtin mamandar uıym­dastyryp otyr. Olar aýda­n turǵyndaryna myńdaǵan betperde taratty, azyq-túlik se­betterin tartý etti. Indetten qa­laı qorǵanýǵa bolatynyn túsin­dirdi. Bul jumys áli de jalǵasyp jatyr.

Sandyqtaýlyq eriktiler qa­ýiptiń qanshalyqty zor ekenin jetelerine jetkize otyryp, saq­tyq sharalaryn buljytpaı oryn­daýdyń qajet ekenin qaperge salatyn myńdaǵan aqparattyq paraqsha taratqan. Vaksına alýdyń qanshalyqty mańyzdy ekenin el ishinde táptishtep tú­sindirýde.

О́tken jyly aýdanda jan ja­dyratar jaqsylyq ister Vo­lonter jylyna baılanysty uı­ym­dastyrylǵan marafonmen bastaldy. Ondaǵy basty maq­sat – erikti bolý árkimniń qolynan ke­letinin aıta otyryp, jal­paq jurtty jaqsy isterge ju­myl­dyrý. Jyl boıy qoly ashyq, pe­ıili keń eriktiler árbir aýyldyq okrýgtegi turǵyndardyń hal-ahýa­lyn kózderinen tasa etken joq. Aldymen qamqorlyqty qa­jet etetin otbasylardyń tizimi ja­sal­dy. Bul tizimge qarııalar, múm­kindigi shekteýli adamdar  engizildi.

Qamqorlyq aıasynda, ásirese medısınalyq baǵyttaǵy sharýalar pysyqtalyp, kem-ketigi toltyrylyp, qaterli indetpen kúresetin qaýqar nyqtala tústi. Bul sharýanyń barlyǵy el bir­ligine arnalyp otyrǵanyn ek­pin túsirip aıta ketken lázim. Týǵan topyraqtyń mereıi de umyt qalǵan joq. Máselen, erik­tiler qaterli indet býyp tur­ǵan kezde de aýyl-aımaqty abat­tan­­dyryp, sanıtarlyq taza­lyq­­ty minsiz etýdi qolǵa aldy. «Tý­ǵan jer» baǵdarlamasy bo­ıyn­sha aýdandaǵy isker jandar aýyl-aımaqtyń ahýalyna ja­nashyrlyqpen qarap, demeý­shilik kómek kórsete bastady.

Sózimiz jalań bolmaýy úshin «Baıdaly» seriktestiginiń bas­­shysy Marat Orazalınniń atqaryp otyrǵan qyrýar sharýa­sy týraly aıta ketkenimiz oryndy. О́tken jyly seriktestik jumysshysy Ivan Poperchaktyń otbasyna kólemi 190 sharshy metrdi quraıtyn bes bólmeli úı salyp berdi. Ádemi shatyrmen kómkerilip, kóztartarlyqtaı etip qaptalǵan eńseli úı alystan menmundalaıdy. Sharýashylyq esebinen meshit, naýbaıhana salyp, jylý qazandyǵyn iske qosyp, feldsherlik-akýsherlik pýnktti jabdyqtap, mektep oqý­shylarynyń barlyq jaǵdaıyn jasaýda. Byltyr «Dıplommen – aýylǵa!» baǵdarlamasy arqyly kelgen 7 muǵalimdi qurqyltaıdyń uıasyndaı jyp-jyly, jaıly bas­panamen qamtamasyz etipti. Ká­dimgi eki qabatty, eńseli úı. Ortalyqtandyrylǵan jylý ar­qyly jylytylady. Feld­sher­lik-akýsherlik pýnktti de qam­qorlyǵyna alǵan. Seriktestik syıǵa tartqan apparattar – medısına salasyndaǵy eń sońǵy úlgidegi quraldar. Tipti aýyl tú­gil, aýdan ortalyǵynan da tabyla bermeýi ábden múmkin. Taıaýda analız jasaıtyn amerıkalyq apparatýralardy 13 mln teńgege alyp bergen.

– FAP aýyldyq okrýgtegi Ve­seloe, Jylandy, Baraqpaı, No­voselovka aýyldarynyń tur­ǵyn­daryna, shamamen alǵanda 1,5 myń adamǵa qyzmet kórsetedi. Seriktestik ápergen EhoKG apparatyn ornatyp aldyq. Almaty men Nur-Sultan qalalarynan bilikti mamandar kelip, qalaı jumys isteıtinin kórsetip berdi. Gemotologııalyq analızator, bıo­hımııalyq apparat arqyly bar­lyq taldaýdy jasaı alamyz. Aýyl turǵyndary analız úshin aýdan nemese oblys ortalyǵyna barmaıtyn boldy, – deıdi dári­ger, medısına ǵylymdarynyń kandıdaty Jibek Orazalına.

О́tken jyly seriktestik sý jańa jedel járdem kóligin syıǵa tartqan. Aýyl turǵyndarynyń basy aýyryp, baltyry syzdaı qalsa, aýdan, oblysqa jetkizýge qajetti janar-jaǵarmaı serik­tes­tiktiń moınynda. Bıyl keń­shar­dyń burynǵy keńsesin satyp alǵan. Endi oǵan tolyǵymen jón­deý jumysyn júrgizip, aýyldaǵy emdeý mekemesine bermekshi. Sol kezde stansıonar da jumys is­teı­tin bolady. Ol ǵımaratqa ýchas­­kelik ınspektor, poshta or­na­laspaq.

Aýyl mektebindegi 124 oqýshy seriktestik esebinen ystyq ta­maqpen qamtamasyz etilgen. As­­pazy da seriktestik esebinen ja­­laqy alady. Oqýshylarǵa qa­jet­ti sporttyq qural-jab­dyq­­­tar túgel. Hokkeı komanda­syn jutyndyryp kıindirip qoı­­ǵan. Eki jyl buryn shaǵyn fýt­bolǵa arnalǵan sapaly, ja­sandy jamylǵysy bar sport alańyn salyp beripti. «Mektep­ke jol» aksııasy aıasynda 1-sy­nypqa baratyn barlyq bala­ oqý quraldarymen, áleý­met­tik ja­ǵynan az qamtylǵan ot­ba­sy­lar­dyń balalary men múm­kin­digi shekteýli oqýshylar tolyq kı­im-keshekpen qamtamasyz eti­ledi.

«Sandyqtaý astyq» serik­testiginiń basshysy Atlan Do­kaev Birlik aýyldyq okrýginiń tur­ǵyn­daryna árqaısysy elý kılo bolatyn 241 qap undy te­gin taratyp bergen. Balkashın aýyldyq okrýgine 256, Jambyl aýyldyq okrýgine 30 qap undy syıǵa tartqan. «SHP 1 maı» serik­testiginiń basshysy Mago­med-Salı Abýev zeınetkerler men múmkindigi shekteýli adamdarǵa elý kılolyq 100 qap un jetkizip berip, qamqorlyq kórsetip otyr. «Svobodnoe» jáne «Maksımovskoe» seriktes­tik­­teriniń basshylary ákeli-ba­laly Aleksandr Zakýsılovter zeınetkerlerge, Aýǵan soǵysynyń ar­dagerlerine uzyn-yrǵasy al­pysqa taıaý adamǵa tegin un taratyp, ósimdik maıyn úlestirgen. Maksımovka aýylynyń burynǵy turǵyny Nıkolaı Mesherıakov zeı­netkerlerge azyq-túlik sebet­terin syılaǵan.

Mine, osylaısha adamdar bir-birine qaıyrymdylyq jasap, qanattandyrýda. Burynǵynyń «elde bolsa ernińe tıedi» deıtin sózi ras-aý shirkin. El ishindegi berekeniń besigin terbetip, aıalap turǵan da jomart júrekti jan­dardyń jumyla atqaryp otyrǵan sharýasy.

Aqmola oblysy,

Sandyqtaý aýdany