Parlament Senatynyń depýtattary óńirlerdegi turǵyndarmen kezdesýlerin jalǵastyrý ústinde, dep habarlady joǵarǵy Palatanyń baspasóz qyzmeti.
Senat Tóraǵasynyń orynbasary Nurlan Ábdirov Qaraǵandy oblysynda saparda boldy. Ol jańadan saılanǵan aýyl ákimderimen, sondaı-aq Ulytaý jáne Jańaarqa aýdandary máslıhattarynyń depýtattarymen kezdesti.
Nurlan Ábdirov júzdesýlerde ótken saılaýdaǵy jergilikti bılik organdarynyń ókilettigi men derbestigin keńeıtýdegi mańyzdylyǵyn atap ótti.
«Elimizde aýyl ákimderin saılaý aıaqtaldy. Osylaısha, biz jergilikti atqarýshy organdardyń derbestigin nyǵaıtýǵa baǵyttalǵan saılaý prosesiniń birinshi jáne mańyzdy kezeńinen tabysty óttik. Bul saıası reformany el Prezıdenti Qasym-Jomart Toqaev byltyrǵy Joldaýynda usynyp, oǵan bıylǵy qańtar aıynda jetinshi shaqyrylymdaǵy Parlament Palatalarynyń birlesken otyrysynda da toqtalǵany belgili. Memleket basshysy azamattardyń sheshim qabyldaý prosesine yqpalyn kúsheıtý úshin osyndaı serpin berýdiń mańyzdylyǵyn atap ótken bolatyn. Osyǵan baılanysty jańadan saılanǵan ákimderge úlken jaýapkershilik júkteledi», dedi Nurlan Ábdirov.
Senat Tóraǵasynyń orynbasary bul tapsyrmany iske asyrý úshin depýtattar aýqymdy zańnamalyq jumysty jedel túrde júrgizgenin eske saldy. Atap aıtqanda, jergilikti ózin ózi basqarý bıýdjetin nyǵaıtý úshin salyqtar men tólemderdiń keıbir túrleri: biryńǵaı jer salyǵy, jer ýchaskelerin paıdalanǵany úshin tólem, jer ýchaskelerin satýdan túsetin túsimder, jer ýchaskelerin jaldaý quqyǵyn satý tólemi tórtinshi deńgeıge berildi. Nurlan Ábdirov bul jańalyqtar aýyldyq, aýdandyq jáne qalalyq bıliktiń derbestigin ulǵaıtýǵa yqpal etetinin aıtty.
Palata Tóraǵasynyń orynbasary jergilikti halyqty tolǵandyratyn ózekti máselelerdi talqylaý jáne sheshý men qoldanystaǵy zańnamanyń tıimdiligin jaqsartý úshin Senat pen máslıhat depýtattarynyń birlesken jumysyn kúsheıtýdiń mańyzdylyǵyn atap ótti.
Senat Tóraǵasynyń orynbasary kezdesýlerge qatysqan quqyq qorǵaý organdarynyń ókilderine arnaǵan sózinde Memleket basshysynyń bastamasymen ázirlengen, elimizdiń quqyq qorǵaý jáne sot júıelerin reformalaýǵa baǵyttalǵan zańdardy qabyldaý depýtattar qyzmetiniń mańyzdy nátıjeleriniń biri bolǵanyn atap ótti.
Tóraǵa orynbasary sapar barysynda óńirdegi aýyl eńbekkerlerimen elimizdiń mal sharýashylyǵyn qoldaý máselelerin de talqylady jáne oblystyń aýyl sharýashylyǵy sektorynyń damý problemalarymen tanysty. Jaqynda Qaraǵandy oblysynda bolǵan dala órtiniń saldarymen kúres jáne óńirdiń zardap shekken ondaǵan sharýa qojalyǵyna keltirilgen zalaldy óteý máseleleri kóterildi. Nurlan Ábdirov keltirilgen zalaldy baǵalaý jáne zardap shekken azamattarǵa ótemaqy tóleý jónindegi jumystardy jedeldetýdiń mańyzdylyǵyn atap ótti.
Senator Dúısenǵazy Mýsın Shyǵys Qazaqstan oblysynyń Jarma jáne Aıagóz aýdandarynda boldy. Depýtat sapar barysynda aýdan aktıvimen jáne aýyl sharýashylyǵy salasynyń eńbekkerlerimen kezdesip, óńirdiń áleýmettik-ekonomıkalyq damý máselelerin talqylady.
Kezdesýler barysynda sondaı-aq elimizdiń agroónerkásip keshenin damytýdyń memlekettik baǵdarlamasyn iske asyrý, elimizdiń agroónerkásiptik keshenin damytýdyń 2021-2025 jyldarǵa arnalǵan ulttyq jobasy, «Jaıylymdar týraly» zańnyń oryndalýy jáne aýyldyq aýmaqtardy damytý máseleleri sóz boldy.
Dúısenǵazy Mýsın qazaqtyń aqbas sıyrynyń tuqymyn ósirýmen aınalysatyn sharýashylyqtyń jumysymen tanysty. Kásiporyn basshylyǵy asyl tuqymdy maldy ósirýdegi seleksııalyq jumystar salasyndaǵy jaǵdaı týraly senatordy habardar etip, sońǵy jyldardaǵy oń ózgeristerdi atap ótti.