Sporttyq quzǵa órmeleýshiler alǵash ret Olımpıadaǵa qatysady. Otandasymyz Rıshat Haıbýllın el namysyn qorǵaıtyn jalǵyz sportshy. Tokıoda sońǵy jattyǵýlaryn jasap júrgen jerlesimiz búgin jarys jolyna shyǵady.
Alpınızm – Olımp dodasyna jańadan qosylǵan bes sporttyń biri. 2016 jyly Halyqaralyq Olımpıada komıtetiniń kezekti otyrysynda Olımp baǵdarlamasyna kirgennen keıin bul sport túriniń damýy jyldam qarqyn ala bastady. Elimizde alpınızmmen kásibı túrde shuǵyldanatyn Ámir Maımuratov, Beknur Altynbekov, Álisher Murat, Tamara Oljabaeva jáne Ásel Marlenova syndy sandaǵan sportshy bar. Solardyń arasynda Rıshat Haıbýllınniń shoqtyǵy bıik.
Qazaqstan atletteri atalǵan sport túrinen alǵash ret 2018 jyly Azııa oıyndaryna qatysqanymen, jeńis tuǵyrynan kórine almady. Araǵa bir jyl salyp Japonııada ótken álem chempıonatynda Rıshat Haıbýllın úzdik jeti sportshynyń qataryna iligip, Olımpıadaǵa joldama aldy.
«Qazir babymdamyn. Josparlanǵan jarystarǵa qatysyp, shyńdala tústim. Álem kýboginde jaqsy nátıje kórsetip, alǵa qoıǵan maqsatymdy tolyq oryndadym. Sondaı-aq halyqaralyq jarystardaǵy tájirıbem de arta tústi. Shyny kerek, qandaı da bir sportshyny basty qarsylasym dep aıta almaımyn. Eń aldymen, óz-ózińdi jeńýiń qajet qoı. Sondyqtan negizinen óz-ózimmen jarysamyn», dedi Haıbýllın.
Keıipkerimiz Olımpıada aldynda Chehııa kýbogine qatysyp, «qıyndyq» jattyǵýy boıynsha kúmis júldeger atandy. Sondaı-aq Shveısarııada ótken álem kýbogynda segizinshi orynnan kórindi.
Alty jasynan bastap quzǵa órmeleýmen shuǵyldanatyn Rıshat búginde Olımpıadada júlde alady degen sportshylardyń qatarynda. Eger de baǵy men baby qatar shapsa, jerlesimizdiń jetistigine súıinshi suraıtyn kún de jaqyn degen úmittemiz. Qysqasy, úmitimiz úzilgen joq áli.