Bıyl «Qazaqstannyń 100 jańa esimi» jobasy boıynsha Qostanaı oblysynan eki birdeı jeńimpazdyń esimi áıgili boldy. Olardyń biri – aqpan aıynda soqqan qarly borannyń astynda qalyp, qalaǵa kire almaı keptelip qalǵan avtokólikterge jaıaý jol bastap júgirgen patrýldik polısııa batalonynyń ınspektory Amantaı Baıjanov.
Joldy jaýyp tastaǵan aq tútek borannyń astynda tizeden qar keship, kólikterdiń aldynda alasura júgirip júrgen sary jolaqty kúrteli polıseıdi júrgizýshilerdiń biri avtoregıstratorǵa túsirip alǵan syńaıly. Bul beınejazba sol kúni-aq áleýmettik jelige taralyp ketti.
Qarly boran kóterilgen 18 aqpan kúni qalanyń ishinde qalypty qyzmetin atqaryp júrgen aǵa leıtenant kezekshi bólimnen Iýbıleınyı shaǵyn aýdanynyń mańaıyndaǵy jol-kólik oqıǵasy bolǵan jerge jet degen nusqaý alady. Jańa shaǵyn aýdannyń mańaıyndaǵy borannyń ekpini qala ishindegiden eki ese kúshti. Dúleı boran tańerteń ǵana saırap jatqan joldy jaýyp tastaǵan. Mejeli shaǵyn aýdanǵa jetken Amantaı qalaǵa kirip jatqan kólikter leginiń aldynda birneshe avtokóliktiń jol shetine shyǵyp, qarǵa batyp qalǵanyn kóredi. Olar keıingilerdiń jolyn bógep, uzynnan-uzaq kólik keptelisi paıda bolypty. Polısııa aǵa leıtenanty sol jerdegi júrgizýshilerdiń kómegimen jol shetine shyǵyp qalǵan kólikterdi qolmen ıterip shyǵaryp, jol qozǵalysyn retke keltirmek bolady. Biraq kólik ishindegiler joldan adasyp, shetke batyp qala bergen soń, ár kóliktiń aldyna túsip, jaıaý júgirip júrip jol kórsetýine týra keldi.
– О́ıtkeni jol qalyń qardyń astynda qaldy, onyń ústine taıaq tastam jer kórinbeıdi, qaıda qarasań da alaı-dúleı aq tútek. Mundaı qysyltaıań sátte kóp oılanyp turýǵa bolmaıdy. Uzyn-sonar kezekte turǵandaı, ornynan jyljymaı turǵan keptelisti qalaıda jónge keltirý kerek. Birinshi turǵan kóliktiń aldyna túsip, júrgizýshige qol bulǵaı otyryp jol kórsete bastadym. Sodan kólik jyldamdyǵyn údete bastaǵan soń, júgirýge týra keldi. Ol kóliktiń sońynan ózge kólikter de jyljı bastady. Osylaısha, joldyń qaýipti tusynan shyǵyp, men – jaıaý, jurt kólikpen úsh shaqyrymdaı jol júrip, qalanyń ishine kirdik. Kólik tizgininde otyrǵan adamdar ústimdegi sary jolaqty kúrteni ǵana kórip otyrypty, – dedi polısııa ınspektory.
Aqpannyń aq boranymen arpalysyp júrip, alpys shaqty kólikti qar qursaýynan qutqarǵan Amantaı osydan keıin kópshiliktiń alǵysyna bólenip, Ishki ister mınıstrliginiń «Quqyq tártibin qamtamasyz etýge qosqan úlesi úshin» medalin omyraýyna taqty. Al oblystyq Polısııa departamentiniń basshylyǵy qyzmettik boryshyn múltiksiz atqarǵan polıseıge alǵys jarııalap, ataýly qolsaǵat tabys etti.
Osy oraıda Amantaıdyń taǵy bir erligin aıtpaı ketpeske bolmaıdy. Onyń ótken jyldyń sáýir aıynda áriptesi Janbolat Jaýtınmen birge patrýldik qyzmetin atqaryp júrip, órtke oranǵan eki qabat úıdiń ishinen 15 adamdy aman-esen alyp shyqqanyn kópshilik áli umyta qoıǵan joq. Tún jarymda qyzyl jalynǵa orana bastaǵan úıdiń qorshaýynan sekirip túsken Amantaı esikti teýip syndyryp, tars uıqyda jatqan adamdardy oıatyp, oıana almaǵandaryn dalaǵa kóterip shyǵarǵan.
– Amantaı birinshi bolyp kirip ketti de, eń aldymen 5 jasar balany alyp shyqty. Odan keıin órtenip jatqan úıge men de kirdim. Tilsiz jaýmen arpalysyp júrgende ústimizdegi kımimiz janyp, ekeýmizdiń de qolymyzdy ot qaryp, kúıik shaldy. Amantaı ıyǵyna deıin kúıdirip aldy. Et qyzýmen júrgende ony eleń qyla qoımadyq, – deıdi Janbolat Jaýtın.
Keıin Amantaı men Janbolatty izdep taýyp alǵan órt shalǵan úıdiń turǵyndary eki polıseıge alǵystaryn jaýdyryp, oblystyq Polısııa departamenti basshylyǵyna olardy arnaıy marapatqa usyný týraly ótinish bildirgen. Kóp keshikpeı qos leıtenant Ishki ister mınıstriniń «О́rtte kórsetken qaısarlyǵy úshin» medalimen marapattalǵan.
Amantaı Baıjanovty «Qazaqstannyń 100 jańa esimi» jobasyna osy jobanyń ótken jylǵy jeńimpazy Dınara Shúkijanova usynypty.
– Jobanyń jeńimpazy boldyń degendi alǵash estigende óz qulaǵyma ózim senbedim. Qarapaıym polısııa qyzmetkerleriniń ishinde tuńǵysh ret osyndaı qurmetke bólengen men ǵana shyǵarmyn. 30 sáýirde Nur-Sultan qalasynda jeńimpazdardy resmı marapattaý rásimine qatystym. Bizdi Memleket basshysy Qasym-Jomart Toqaev quttyqtap, barshamyzdyń el ıgiligi úshin adal eńbek etip, budan da joǵary tabystarǵa qol jetkizetinimizge senim bildirdi, – dedi Amantaı Baıjanov.
Onyń aıtýynsha, patrýldik qyzmet barysynda oqys oqıǵalar kezdesip turady. Ondaıda qaýip-qaterge bas tigýge týra keledi. Byltyr 10 sáýirge qaraǵan túni Amantaıdyń basynan dál osyndaı taǵy bir oqıǵa ótken edi.
Tún jamylǵan úsh qaraqshy oblys ortalyǵyndaǵy Amangeldi kóshesinen «Tekstılshık» saıajaıyna deıin «Indraıver» taksıine tapsyrys beredi. 38 jastaǵy júrgizýshi mingen «Lada Kalına» avtokóligi kelgen soń, kúdiktilerdiń ekeýi – artqy oryndyqqa, bireýi júrgizýshiniń janyna jaıǵasady. Taksı mejeli jerge kelip toqtaǵan soń, artta otyrǵandardyń biri júrgizýshiniń moınyna arqan salyp, aqsha talap etip, qylǵyndyra bastaǵan. Sátin salǵanda, júrgizýshi moınyn qıyp bara jatqan qyl buraýdan sytylyp shyǵyp, polısııaǵa habarlap úlgeredi. Abdyrap qalǵan qaskúnemder kóliktegi eki uıaly telefon men regıstratordy alyp, iz sýytady.
Bul týraly habar alysymen «Tekstılshık» shaǵyn aýdanyna jaqyn mańaıda qoǵamdyq kúzet qyzmetinde júrgen polısııa aǵa leıtenanttary Amantaı Baıjanov pen Jánibek Myrzahmetov dereý oqıǵa ornyna jetedi. Aldymen jábirlenýshiden kúdiktilerdiń túr-tulǵasy, bet-álpeti týraly málimet alyp, ony barlyq kúzet beketine jibergen polısııa patrýli úsh qaraqshynyń izine túsedi. Jaqyn mańaıdaǵy qýys-qaltarystyń birin qaldyrmaı súzip shyqqan tártip saqshylarynyń kóligi Qorǵan kóshesine burylady. Anadaıda sýyt júrip bara jatqan eki adam polısııa kóligin kóre sala qasha jónelgen. Alaıda ekeýi de alysqa uzaı almady, tájirıbeli tártip saqshylary qýyp jetip, kózdi ashyp-jumǵansha ekeýiniń de qolyna kisen salyp úlgeredi. Kúdiktiler polısııa bólimine jetkiziledi. Sálden soń bólimshege kelgen taksı júrgizýshisi eki qaraqshyny birden tanyǵan. Iz sýytyp úlgergen úshinshi qaraqshy keıin óz páterinde ustalǵan. Kúdiktilerdiń úsheýi de Qostanaı oblysynyń buryn sottalǵan 20-24 jas shamasyndaǵy turǵyndary bolyp shyqty. Qazir qaraqshylar temir tordyń arǵy betinde otyr. Al polısııa aǵa leıtenanty Amantaı Baıjanov qoǵamdyq tártip kúzetindegi qarbalas qyzmetin jalǵastyryp júr.
– Jubaıymnyń esimi Gúlnar, ekeýmiz Arslan esimdi ul tárbıelep otyrmyz. Qyzmet babymen júrip, úıde kóp bola almaı qalamyn. Gúlnar mundaıǵa ábden úırengen. Men oǵan polıseıdiń jary besaspap bolý kerek dep ázildeımin. Biraq qyzmetten bosaı qalsam, otbasymmen birge tabıǵat aıasynda, Tobyl jaǵasynda taza aýada serýendep, bos ýaqytymdy paıdaly ótkizýge tyrysamyn. Biraq mundaı sátter óte sırek. О́ıtkeni jumys qaýyrt, – deıdi tártip saqshysy.
Qostanaı oblysy