Jyl basynan beri Qazaqstanda et baǵasy 13%-ǵa qymbattady, dep jazady Egemen.kz.
Aýyl sharýashylyǵy mınıstrligi baǵa óse beretinin málimdedi, dep habarlaıdy «Eýrazııa» birinshi arnasy.
Aqmyrza Janataev - 10 jyldan astam jylqy, sıyr jáne qoı ósirýmen aınalysatyn tájirıbeli malshy. Ol qazirgi ýaqytta mal ustaý tıimsiz ekenin aıtady. Kólik saımany men janarmaı shamamen 10%-ǵa qymbattady, jem baǵasy tórtten bir ese ósti. Bıyl jaǵdaıdy shóp pen arpanyń tapshylyǵy qıyndatty. Fermer úshin ár bas altynmen ólshenedi, biraq deldaldar taýar baǵasyn tómendetýge tyrysyp jatyr.
«Deldaldar bizden arzanǵa, kelisine 1400, 1700 teńgege satyp alady. Biraq naryqta olar keminde iri qara etin 2400, qoı etin - 4000-ǵa deıin, jylqy eti - 5000 teńgege deıin satady», deıdi sharýa qojalyq basshysy Aqmyrza Janataev.
Fermerler jaqyn arada 1 keli et úshin 4000 teńge suraýǵa týra keletinine senimdi. Qazirdiń ózinde sıyr eti, jylqy eti men qoı etiniń baǵasy ortasha eseppen 13%-ǵa qymbattaǵan.
Boljamdarǵa súıensek, et kóp uzamaı tek mereke kúnderi ǵana bolatyn dámdi taǵamǵa aınalady. Arzan bolǵany úshin taýyq etine suranys artýy múmkin.
Aýyl sharýashylyǵy mınıstrligi et baǵasyna janama áser etetin faktorlardy sheshýge tyrysyp jatqanyn aıtty.
«Shóp daıyndaý jospary jasaldy. Jospar boıynsha 23 mıllıon tonna shóp daıyndalady. Onyń ishinde 1 tamyzdaǵy jaǵdaı boıynsha 60%-y nemese 15 mln tonnasy oryndaldy. Mınıstrlik jem-shóp qunyn tómendetý boıynsha da jumys júrgizip jatyr», deıdi QR Aýyl sharýashylyǵy mınıstrliginiń bas sarapshysy Ǵanı Jumahmetov.
Baǵanyń qymbattaǵanyna qaramastan, qazaqstandyqtar etti kóbirek tutyna bastady. Sıyr etine suranys 1%-ǵa, qoı etine 1,5%-ǵa ósti. Et ónimderi boıynsha jylqy eti kósh bastap tur. Ettiń bul túrine suranys 8 paıyzǵa ósti.