Sońǵy ýaqytta OV 156/1 tergeý ızolıatoryna esirtki zattardy jáne olardyń analogtaryn ótkizý maqsatynda zańsyz daıyndaý, qaıta óńdeý, satyp alý, saqtaý, tasymaldaý sııaqty qylmys jasaǵan 19-28 jas aralyǵyndaǵy jas qyzdar kóp túsip jatyr, dep habarlaıdy Egemen.kz.
О́rimdeı qyzdardyń ómirleri temir torda ótip jatqany ókinishti. Sońy nege ákelip soǵatynyn bile tura nege osyndaı iske barady? Mekemeniń jedel bólimi qyzmetkerleri temir torǵa toǵytylǵan qyzdardyń birinen mundaı áreketke qalaı barǵandyǵy týraly suraǵan. Nege degende, osyny oqyp otyrǵan jastarǵa oı salsyn, ondaı iske aralaspasyn degen maqsatta.
– Men 21 jastamyn. Qazirgi ýaqytta jastardyń kóbi býkmekerlik kompanııalarda stavkalar qoıady. Jeńiske jetken saıyn, baýraı bastaıdy. Birde úlken aqsha joǵalttym. Bul týraly ata-anama aıtýǵa qoryqtym. Qala kóshelerin kezip júrip, «kýrer qajet, jumys kestesi jyljymaly, jalaqysy joǵary» degen úıdiń qabyrǵasyna jabystyrylǵan habarlandyrýǵa kózim tústi. Qýanyp ketip, kórsetilgen nómirge qońyraý shaldym. Alaıda, jumystyń nege aparyp soǵaryn bilmegen edim. Túsingenim, sıntetıkalyq esirtki zattaryn bir jerden ekinshi jerge aparýym kerek eken. Bar oıym, aqsha taýyp, qaryzymdy jaýyp, keıin kýrer jumysynan bas tartamyn dep oıladym. Biraz kýrermen jumys istegennen keıin, esirtki zattaryn salý kezinde polısııaǵa ustaldym. Bul mekemege túskende, jastyq shaǵym temir torda ótetinin bildim. О́kinishtisi, 297-bap 3-bólim boıynsha, eń az degende 10 jyl bas bostandyǵynan aıyrý jazasyn aldym. Eger ýaqytty qaıtarsa, men esirtki quraldaryn tasymaldamas edim, – deıdi sotty bolǵan azamatsha.
Mundaı oqıǵa qanshama?! Osy maqalany oqyǵan jastar jaza basyp, jazalanyp júrmeıdi dep úmittenedi mekeme qyzmetkerleri.