Qansha kúnnen beri barlyq tusy tutas «qyzaryp» turǵan Qazaqstannyń epıdemııalyq ahýalynan keshe shamaly bolsyn bir oń ózgeris baıqaldy. 4 tamyzdaǵy jaǵdaı boıynsha elimizdiń ońtústik óńiriniń óńi ózgerip, Túrkistan oblysy «jasyl aımaqqa» ótti. Endi osy «jasyl» basqa óńirlerimizge de juǵysty bolsa eken degen tilektemiz. О́ıtkeni kún túgili birneshe aı boıy «qyzyldyń» qursaýynan shyǵa almaı jatqan óńirlerimiz bar. Aıtalyq, elordamyzdyń «qyzýy» kóterilip turǵanyna bes aı boldy.
Búginde epıdemııalyq jaǵdaıy tym kúrdelenip ketken astana «qyzyldan» da asyp túsip, «qoıý qyzyl aımaqqa» ótip ketken bolatyn. Nur-Sultan qalasynyń bas memlekettik sanıtarlyq dárigeri Sarhat Beısenovanyń aıtýynsha, «qoıý qyzyl aımaqta» 18 shilde men 2 tamyz aralyǵynda Qazaqstannyń bes qalasy turǵan edi. Qaýip-qater deńgeıiniń óte joǵary kórsetkishi – 100 myń turǵynǵa shaqqanda 200-den asa ınfeksııalyq tósektik orynnyń tolýy. Bul rette kesheden beri ınfeksııalyq stasıonarlardyń júktemesi 69%-dy qurap, elorda qaıtadan «qyzyl aımaqqa» ótti.
«Bıylǵy maýsymnyń ekinshi onkúndiginen bastap «Delta» asa kontagıozdy shtamynyń taralýymen astanada epıdemııalyq jaǵdaı kúrt nasharlady jáne maýsym-shilde aılarynda jyl basynan bergi barlyq syrqattanýshylyqtyń 55%-y tirkeldi. Shilde aıynda aýrýshańdyq deńgeıi mamyr aıyndaǵy kórsetkishten 2,4 ese, maýsym aıynda 2,3 ese asyp tústi», dedi S.Beısenova.
4 tamyzdaǵy derekti keltirsek, Nur-Sultan qalasynda 2 738 adam ınfeksııalyq stasıonarda em qabyldaýda. Sonyń ishinde 263 adam jansaqtaý bóliminde ómir men ólimniń arasynda jatyr. О́zdiginen demalýǵa áli joq 38 adam О́JJ apparatyna jalǵanǵan. Jalpy, jansaqtaý bólimindegi tósektik oryn júktemesi 83 paıyzdy qurap otyr. Osyǵan qarap-aq bul indettiń adam ómirine orasan qaýip-qater tóndirip turǵanyn túsinýge bolady. Biraq qansha qaıǵyly jaǵdaıdy kórip-bilip otyrsa da, qoǵamda beıqamdyq áli de basym bolyp tur. Astanadaǵy ınfeksııalyq stasıonardyń birinde jumys isteıtin juqpaly aýrýlar dárigeri Gúlbaqyt Adıjanova jaǵdaıy aýyr naýqastardyń kópshiligi ekpe almaǵanyn, sanıtarlyq talaptardy elemeı, saltanatty is-sharalarǵa qatysqanyn aıtady.
«Bizde bir erli-zaıyptylar boldy. Tekserý júrgizgen kezde olar jaqynda ǵana adam kóp jınalǵan mereıtoıǵa barǵanyn moıyndady. Kózderine jas alyp, eshqaıda shyqpaǵanymyz durys bolar edi dep ókinishin bildirdi. О́ıtkeni ol kezde kúıeýiniń jaǵdaıy tym nashar edi. Densaýlyqpen oınamaý kerek ekenin taǵy da eske salǵym keledi. Eger siz sanıtarlyq normalardy saqtamasańyz jáne ekpe almasańyz, onda «maǵan aýrý juqpaıdy» dep erkin júre berýge bolmaıdy», deıdi dáriger.
Bir apta buryn qalada Syzdyqovtar otbasy qaıǵyly oqıǵaǵa dýshar bolyp, otaǵasynan aıyryldy. Koronavırýstyń kesirinen er adamnyń tynys alýy qıyndap, ókpesi isinip, jansaqtaý bóliminde qaıtys boldy. Artynda qalǵan januıasy bul aýrýǵa der kezinde nazar aýdarmaǵanyna ókinedi.
«Bári kenetten boldy. Aldymen anam aýyryp qaldy, sodan keıin marqum ákem. Onyń densaýlyǵy eki kún ishinde kúrt nasharlap ketti. Ekeýi birden KVI aýrýhanasyna jatqyzyldy. Buryn esh jeri aýyrmaǵan, ıaǵnı densaýlyǵynda kinárat bolmaǵan edi. Áli kúnge deıin ákemizdiń ómirin osy vırýs jalmaǵanyna sene alar emespiz. Biz onymen qoshtasyp, janazasyn da durystap shyǵara almadyq. Bul ınfeksııa bolǵandyqtan, ony máıithanadan birden zıratqa alyp ketti. Mundaı qaıǵyny eshkimniń de basyna bermesin», deıdi marqumnyń qyzy Gúljan Syzdyqova.
Sondyqtan ókinip, opyq jep qalmaýymyz úshin talap pen tártipke baǵynyp, qajetti sharalardyń bárin jasaýymyz kerek. Dárigerler tek ujymdyq ımmýnıtetti qalyptastyrý arqyly ǵana pandemııany jeńýge bolatynyn udaıy aıtyp keledi. Iаǵnı indetten qutylýdyń jalǵyz joly – vaksına saldyrý.