Jalpyǵa birdeı deklarasııalaýdyń birinshi kezeńi 2021 jylǵy 1 qańtardan bastaldy. Bul kezeńde deklarasııany tapsyrý boıynsha mindetteme memlekettik qyzmetshilerde, olarǵa teńestirilgen adamdarda, sondaı-aq atalǵan adamdardyń jubaılarynda týyndaıdy. Bul týraly QR QM Memlekettik kirister komıtetinde habarlady, dep jazady Egemen.kz.
Memlekettik kirister komıtetinde «Sybaılas jemqorlyqqa qarsy is-qımyl týraly» Qazaqstan Respýblıkasy Zańynyń 1-babynda bekitilgen «memlekettik fýnksııalardy oryndaýǵa ýákilettik berilgen adamdarǵa teńestirilgen adamdar» uǵymynyń maǵynasyn túsindirdi.
Bul sanatqa kelesi tulǵalar jatady:
- jergilikti ózin-ózi basqarý organdaryna saılanǵan adamdar, ıaǵnı oblys, aýdan, qaladaǵy aýdan ákimderi jáne t.b., sonymen qatar onyń ishinde máslıhat depýtattary;
- QR Prezıdenttigine, Parlamentiniń nemese máslıhattardyń depýtattyǵyna, aýdandyq mańyzy bar qalalardyń, kentterdiń, aýyldardyń, aýyldyq okrýgterdiń ákimdigine, sondaı-aq jergilikti ózin-ózi basqarý saılanbaly organynyń músheligine kandıdat retinde tirkelgen azamattar;
- jergilikti ózin-ózi basqarý organynda turaqty nemese ýaqytsha jumys isteıtin qyzmetshiler-máslıhattyń, ákimdiktiń jáne t.b. qyzmetkerleri;
- memlekettik uıymda nemese kvazımemlekettik sektor sýbektisinde basqarýshylyq fýnksııalardy oryndaıtyn adamdar. Onyń ishinde, osy sanattaǵy adamdarǵa uıymnyń múlkin basqarý jáne oǵan bılik etý quqyǵy jáne buıryqtar men ókimder shyǵarý, sondaı-aq qol astyndaǵy qyzmetkerlerine qatysty kótermeleý sharalaryn jáne tártiptik jazalar qoldaný quqyǵy berilgen adamdar jatady. Ádette, mundaı ókilettikterge uıym basshysy, bas býhgalter jáne materıaldyq qundylyqtardy derbes basqarýǵa quqyǵy bar nemese olardyń qozǵalysyn baqylaýdy júzege asyratyn adamdar ıe;
- satyp alýdy uıymdastyrý jáne ótkizý boıynsha sheshimder qabyldaýǵa ýákiletti tulǵalar. Osy sanatqa kvazımemlekettik sektor sýbektisiniń satyp alýdy uıymdastyrý jáne ótkizý rásimderin oryndaýǵa jaýapty qurylymdyq bólimsheleriniń basshylaryn ne satyp alýdy uıymdastyrý jáne ótkizý jónindegi ókilettikter júktelgen derbes qurylymdyq bólimsheniń basshysynan tómen emes laýazymdy atqaratyn laýazymdy adamdardy jatqyzǵan jón;
- QR Ulttyq Bankiniń jáne onyń vedomstvo qyzmetshileri;
- azamattyq avıasııa salasyndaǵy ýákiletti uıym qyzmetshileri;
- qarjy naryǵy men qarjy uıymdaryn retteý, baqylaý jáne qadaǵalaý jónindegi ýákiletti organ qyzmetshileri.
«Deklarasııany qaǵaz túrinde tabys etý merzimi 2021 jylǵy 15 shildede aıaqtaldy. Osylaısha, deklarasııany elektrondy túrde tapsyrýdyń sońǵy merzimi 2021 jyldyń 15 qyrkúıegi», dep atap ótti MKK-de.