QR Densaýlyq saqtaý mınıstri «Medısınalyq-sanıtarııalyq alǵashqy kómek kórsetetin densaýlyq saqtaý uıymdaryna jeke tulǵalardy bekitý qaǵıdalaryn bekitý týraly» 2020 jylǵy 13 qarashadaǵy buıryǵyna ózgerister men tolyqtyrýlar engizdi, dep habarlaıdy Egemen.kz.
Jeke tulǵalardyń emhanaǵa tirkelýi olarǵa TMKKK (tegin medısınalyq kómektiń kepildik berilgen kólemin) aıasynda jáne MÁMS (mindetti áleýmettik-medısınalyq saqtandyrý) júıesinde jeke sáıkestendirý nómiri arqyly alǵashqy medısınalyq-sanıtarlyq kómekti alýǵa múmkindik beredi.
Buıryqta kórsetilgendeı, tegin medısınalyq kómektiń kepildik berilgen kólemi aıasynda azamattarǵa usynylatyn alǵashqy medısınalyq-sanıtarlyq kómek el azamattarymen qatar qandastarǵa, bosqyndarǵa, shetel azamattary men Qazaqstanda turaqty turatyn azamattarǵa kelisimshart aıasynda kórsetiledi.
«Jeke tulǵa emhanaǵa nemese medısınalyq ortalyqqa tirkelgen kezde, osyǵan deıingi medısınalyq qyzmet alǵan mekemeden avtomatty túrde shyǵarylady», delingen buıryqta.
Sondaı-aq azamattarǵa emhanany tańdaý múmkindigi berilip, turaqty jáne ýaqytsha mekenjaı boıynsha sol emhanaǵa tirkele alady. Sol sııaqty azamattar emhanaǵa «Elektrondy úkimet» veb-portaly arqyly ótinish berip, ózdiginen tirkele alady. Emhana azamattarǵa qatysty jeke málimetterdi tıisti memlekettik aqparattyq júıeden alady.