О́rt sóndirýshiler birneshe kún boıy joıqyn órtti sóndirýge tyrysyp jatyr. Grekııanyń áıgili kýrorty jáne Krıtten keıingi ekinshi aral – Ebveı aralynan 2000-nan astam adam evakýasııalandy, dep jazady Egemen.kz VVS-ge silteme jasap.
Demalys kúnderi týrıster men Afınanyń soltústik-shyǵysynda ornalasqan Ebveı aralynyń turǵyndary parommen materıkke jetkizildi. Araldaǵy úıler órtenip, elektr symdary zaqymdaldy.
Qazir Grekııada ondaǵan orman órti órship tur, biraq olardyń ishindegi eń aýqymdysy Ebveı aralynda bolyp jatyr. Demalys kúnderi olardy sóndirý operasııasyna júzdegen órt sóndirýshi, áskerıler men 17 ushaq, tikushaq tartyldy.
«Bizde qazir eki órt fronty bar: bireýi eldiń soltústiginde, ekinshisi ońtústiginde. Alda taǵy bir qıyn kesh pen taǵy bir qıyn tún kútip tur», dedi Grekııa azamattyq qorǵaý mınıstriniń orynbasary Nıkos Hardalıos.
Ol Afınada jaǵdaı jaqsarǵanyn, biraq qurǵaq jeldiń kúsheıýine baılanysty órt qaıta órshýi múmkin degen qorqynysh baryn aıtty.
Osy aptanyń basynda ormanda shyqqan órt Afınaǵa jaqyndap, kóshelerdi qatty tútin basyp, birneshe úı órtenip ketti. Juma kúni keshke bılik astananyń soltústik mańyndaǵy turǵyndardy jappaı evakýasııalady.
Grekııada bir apta boıy aptap ystyq boldy. Eldiń keı jerlerinde aýa temperatýrasy 47 gradýsqa deıin jetti. Endi termometr 40-tan tómendegen. Alaıda eldegi aýa temperatýrasynyń osynshalyq kóterilýi shamamen 30 jyl boıy baıqalmaǵan.
Eýropalyq orman órtteriniń aqparattyq júıesiniń habarlaýynsha, Grekııada shyqqan órt 56 myń gektar aýmaqty qamtydy.
Bıylǵy jazda orman órti Grekııa, Albanııa, Bolgarııa, Soltústik Makedonııa men Túrkııada, sondaı-aq AQSh-tyń Kalıfornııa shtatynda shyqty.
Iаkýtııadaǵy órt, resmı málimetter boıynsha, qazirdiń ózinde 6 mıllıon gektardy sharpyǵan. Onda 150-den astam orman órti shyqqan. Ony sóndirýge myńdaǵan adam, júzdegen tehnıka tartyldy.
Senbide Iаkýtııanyń ortalyq bóligindegi Bıas-Kıýel aýylynda 30-dan astam úı órtenip, turǵyndary qaýipsiz jerge kóshirildi.
Jeksenbide bılik Kalvısa men Haryıalah aýyldarynyń turǵynyn evakýasııalady.