Ulttyq statıstıka bıýrosynyń SQO boıynsha departamentiniń málimetinshe, bıylǵy qańtar-shildedegi ınflıasııa 5,3 %-dy qurady, dep habarlaıdy Egemen.kz.
Eń kóp qymbattaǵany – azyq-túlik. Máselen kókónister jyl basynan 21,3 %-ǵa, maı jáne toń maı - 11,5 %-ǵa, qant - 10,3 %-ǵa, nan – 9,8 %-ǵa, un 9,6 %-ǵa qymbattady.
Baǵasy ósken azyq-túliktiń ishinde jarmalar, balyq jáne teńiz ónimderi, alkogolsiz sýsyndar, toqash jáne unnan daıyndalǵan kondıter, sút ónimderi bar.
Olar 8,4-1,5 % aralyǵynda qymbattaǵan. Alaıda jumyrtqa 10,4 %-ǵa, kúrish 7,9 %-ǵa arzandady. Jeti aıdyń ishinde benzın 16,4 %-ǵa, avtomobılder 6,9 %-ǵa, úıge qajetti zattar 4,7 %-ǵa, gıgıenalyq taýarlarǵa – 4 %-ǵa, jýý jáne tazalaý quraldaryna 3,8 %-ǵa, farmasevtıkalyq ónimderge 2,5 %-ǵa, kıim jáne aıaq kıimge 2 %-ǵa qymbattady.
Budan basqa tarıfterde de ózgeris bar. Máselen elektr qýaty – 18,5 %-ǵa, taratý jelisi boıynsha tasymaldanatyn gaz 9,9 %-ǵa ósken. Poshta qyzmetinde, notarıýs, saqtandyrý qyzmetterinde, demalys, oıyn-saýyq jáne mádenıet salasyndaǵy qyzmetter de 6,5-2 % aralyǵynda ósken.