Beıjińniń Chaoıan saıabaǵyndaǵy Szıntaı murajaıynda Abaı oqýlary ótti, dep habarlaıdy Egemen.kz QazAqparat tilshisine silteme jasap.
Shara Abaı eskertkishine gúl qoıý rásiminen bastaldy.
Oǵan Syrtqy ister mınıstrligi, QHR Mádenıet jáne týrızm mınıstrligi, Qytaıdyń Shet eldermen dostyq qoǵamy, ShYU hatshylyǵynyń ókilderi, TMD elderiniń Qytaıdaǵy dıplomatııalyq mıssııalarynyń basshylary men stýdentter qatysty.
Qazaqstan Respýblıkasynyń QHR-daǵy Elshisi Ǵabıt Qoıshybaev óz sózinde Abaı shyǵarmashylyǵy, onyń qazaq fılosofııasy men ádebı tiliniń qalyptasýyndaǵy róli týraly aıtty.
«Osydan jeti jyl buryn, dál osy jerde, Beıjińniń qaq ortasynda uly aqynymyz Abaıǵa eskertkish ornatyldy. Bul aıtýly oqıǵa ekijaqty mádenı-gýmanıtarlyq yntymaqtastyqta mańyzdy iz qaldyryp, Qytaı jurtshylyǵyn qazaq ádebıetiniń klassıkterimen tanystyrý jolyndaǵy kezekti qadam boldy», dedi ol.
Dıplomat daryndy aýdarmashy Ha Hýanchjan Abaıdy qytaı tiline birinshi bolyp aýdarǵanyn eske saldy. Ataqty jazýshy jáne ádebıettanýshy Akbar Májıt te Abaı shyǵarmalaryn qytaı tiline aýdarýǵa úlken úles qosqanyn atap ótti.
О́z kezeginde qytaılyq músinshi Iýan Sıkýn sońǵy jyldary Beıjińdegi eskertkishiniń janynda Abaı oqýlaryn ótkizý jaqsy dástúrge aınalǵanyn aıtty.
«Jyl saıyn osynda Qazaqstan men Qytaı jastary jınalyp, Abaıdyń klassıkalyq óleńderin oqıdy», dedi ol.
Shara barysynda qazaq tilin oqyp jatqan qytaılyq stýdentter men Qytaıda oqıtyn qazaqstandyq jastar, sondaı-aq qazaqstandyq dıplomattardyń balalary Abaı shyǵarmalarynan úzindi oqyp, qoıylym kórsetti.