Bul týraly Úkimet otyrysynda QR Premer-Mınıstri Asqar Mamın aıtty, dep habarlaıdy Egemen.kz.
«Bilim berýdiń dástúrli formatyna oralý týraly sheshim qabyldandy. Osyǵan oraı oqýshylar men pedagogterdiń qaýipsizdigi men densaýlyǵyn saqtaýdy qamtamasyz etý boıynsha uıymdastyrýshylyq máselelerdi barynsha tezdetip sheshý qajet», dedi Asqar Mamın.
Úkimet basshysy osyǵan baılanysty Bilim jáne ǵylym, Densaýlyq saqtaý mınıstrlikterine, óńirlerdiń ákimdikterine birqatar tapsyrma berdi.
«Jańa oqý jylynda mektepke deıingi jáne orta bilim berý uıymdarynda, sonymen qatar kolledjder men joǵary oqý oryndarynda oqý shtattyq rejımde qamtamasyz etilsin. Bilim mınıstrligi ákimdiktermen birlesip, árbir mektepke dástúrli formatta oqý boıynsha naqty usynymdardy jetkizsin. Osy jylǵy 25 tamyzǵa deıin medısınalyq qarsy kórsetilimderi bar adamdardan basqa, pedagogtar men tehpersonaldy vaksınalaýmen 100 paıyz qamtamasyz etsin», dedi Asqar Mamın.
Úkimet basshysy barlyq bilim berý uıymyn oqý jylyn bastaýǵa 100 paıyz daıyn bolýyn eskertti.
«Mektepterde jóndeý jumystaryn ýaqytynda aıaqtaý qajet. Máselen, jóndeý jumystary aıaqtalmaǵan mektepterdiń eń kóbi Almaty oblysynda – 9 mektep, odan keıin Qostanaı oblysynda – 6, Batys Qazaqstan oblysynda – 5. Ákimderge qoıylatyn mindet – barlyq bilim berý uıymdary oqý jylyn bastaýǵa 100 paıyz daıyn bolýy tıis. Balalardyń qaýipsizdigi, tamaqtandyrý jáne mektepke jetkizý boıynsha barlyq máseleler sheshimin tabýy kerek», dedi A.Mamın.