Nemis temirjolshylary seısenbige qaraǵan túni búkilhalyqtyq ereýilge shyqty. Bul týraly GDL kásipodaǵynyń basshysy málimdedi. Kásipodaq músheleriniń 95 paıyzy bul qadamdy qoldaǵan. Osyǵan baılanysty jolaýshylardyń júrip-turýyna kedergi kelýi múmkin. Temirjol qyzmeti muny da eskerip otyr.
GDL kásipodaǵynyń basshysy Klaýs Veselskııdiń aıtýynsha, ereýilge alǵash bolyp búkil júk poıyzdarynyń qyzmetkerleri shyqpaq. Olar seısenbi kúni keshki 17:00-den bastap sherýletedi. Sodan keıin, sársenbi kúni olarǵa jolaýshylar poıyzdarynyń qyzmetkerleri qosylady. Jappaı ereýil jumaǵa deıin sozylady.
Kásipodaq jalaqyny 3,2 paıyzǵa kóterýdi jáne 600 eýro kóleminde bir rettik «koronavırýs bonýsyn» tóleýdi talap etip otyr. Germanııadaǵy temirjolǵa jaýapty Deutsche Bahn operatory muny qabyldaǵan joq. Kompanııa pandemııa bastalǵaly beri mıllıardtaǵan shyǵynǵa ushyrady. Buǵan taıaýda bolǵan sý tasqynyn qosyńyz. Qysqasy, Deutsche Bahn-nyń shyǵyny shash-etekten.
Deutsche Bahn qalaaralyq poıyzdardyń tórtten bir bóligi ǵana sársenbi men beısenbide júretinin, Berlın men batystaǵy qalalarmen, sondaı-aq Gambýrg pen Frankfýrt arasyndaǵy baılanystarǵa basymdyq beriletinin habarlady.
Kompanııa jolaýshylardy qajetsiz saıahattan bas tartýǵa shaqyrdy jáne ár orynǵa tapsyrys berý úshin koronavırýsqa baılanysty shekteýlerdi alyp tastaıtynyn aıtty.
Germanııa aýmaqtary qazir jazǵy demalysta. Sondyqtan saıahatshylar poıyz qyzmetine jıi júginedi. Biraq aldaǵy eki kúnde temir jol qyzmeti báseńdep qalatyndyqtan, jolaýshylar satyp alǵan bıletiniń qunyn qaıtarýdy talap etýi múmkin.
Osylaısha, GDL kásipodaǵy óz maqsatyna jetýi yqtımal. Uıymǵa 35000 jumysker múshe. Buǵan deıin kásipodaq 2014 jáne 2015 jyldary segiz ret jalpyulttyq ereýilge shyǵyp, óz talaptaryn oryndatqan.