Byltyrdan beri Qyzylorda oblysynda indet juqtyrǵan 12 580 adam tirkelip, onyń 77 paıyzy aıyǵyp shyqty. Pnevmonııamen aýyrǵan 1 867 naýqastyń 1 580-i emdeldi.
Sonymen qatar osy jyldyń maýsym-shilde aılarynda ınfeksııalyq tósek-oryn 585-ten 2 340-qa, al reanımasııalyq oryn 90-nan 172-ge deıin kóbeıip, qazir júkteme 55 paıyzdy qurap otyr. Premer-Mınıstr Asqar Mamınniń tóraǵalyǵymen ótken Úkimet otyrysynda aımaqtaǵy epıdemııalyq ahýaldy baıandaǵan oblys ákimi Gúlshara Ábdiqalyqova osyndaı derekterdi málim etti.
«Qurylysy byltyr bastalǵan modýldik stasıonar iske qosylyp, kovıdtik naýqastardy qabyldaı bastady. О́ńirde 6 ottegi stansasy jumys isteýde. Dári-dármekten tapshylyq joq. Koronavırýs ınfeksııasyna qarsy kúres jumystaryna qajetti medısınalyq kadrlar men qural-jabdyqtar jetkilikti», dedi oblys ákimi.
Qazir oblysta táýligine 1300-1500 synama alynýda. Ekpe alatyn 401 myń turǵynnyń 61,4%-y vaksına aldy. Qyrkúıek aıynda kórsetkish 85%-ǵa jetedi dep josparlanýda. Aımaqta Ashyq jobasy arqyly 2 749 nysan jumys istep jatyr. Bul rette monıtorıngtik toptar jumystaryna basa nazar aýdarylyp otyr. Búginge deıin 167 top 12 441 nysanǵa reıdtik tekseris júrgizdi. Nátıjesinde, karantın talaptaryn buzýdyń 459 deregi anyqtalyp, 33,4 mln teńge aıyppul salyndy.
Epıdemııalyq ahýalǵa baılanysty atqarylyp jatqan jumystar barysy kún saıyn derlik ótkizilip jatqan brıfıngterde aıtylady. BAQ ókilderimen osyndaı kezdesýde tek 9 tamyzda monıtorıngtik top oblys boıynsha 15 reıd uıymdastyryp, 55 nysan tekserýden ótkeni baıan etildi. Osy bir kúnniń ishinde karantın talaptaryn saqtamaǵan 12 oqıǵa tirkelgen. Olardyń kópshiligi – otbasynda toı uıymdastyrǵandar. Ondaılar oblys ortalyǵymen qatar Aral, Qazaly, Shıeli aýdandarynda kóbirek anyqtalyp otyr. Qyzylorda qalasynda ornalasqan kafe qyzmetkeriniń kelýshilerge qorǵanysh quraldarynsyz qyzmet kórsetkeni de belgili boldy. Olardyń bárine ákimshilik aıyppul salyndy.
Byltyr egde kisilerge jaýdaı tıgen dert bıyl balalar arasynan jıi baıqalyp otyrǵany da mamandardy alańdatýly. Qazir kópbeıindi oblystyq balalar aýrýhanasynda 72 naýqas em alýda. Onyń 59-y – ártúrli jastaǵy balalar. Qalǵandary – balalardyń analary men kútim boıynsha jatqyzylǵandar.
Oblystyq balalar aýrýhanasynyń pedıatr dárigeri Juldyz Qýatovanyń aıtýynsha, sáýir aıynda aýrýhanadan 20 tósektik koronavırýs ınfeksııasy bólimshesi ashylsa, shildede indettiń órshýine baılanysty oryn sany 90-ǵa jetken.
«Bir jasqa deıingi sábıler arasynda da indetke shaldyqqandar tirkelýde. Osy kúni jansaqtaý bóliminde 2 bala jatyr. Onyń biri – náreste, ekinshisi – jasóspirim bala. Kópshiligi aýrýhanaǵa jaǵdaıy nasharlap, temperatýrasy 39-40-tan túspeı keledi. Sondyqtan balalardy kópshilik oryndarǵa aparýdan bas tarta turǵan jón», deıdi dáriger.
Monıtorıngtik top ókilderi de, dáriger mamandar da aýrýdy taratpaýdyń birden-bir joly toı ótkizýdi toqtatý ekenin aıtyp otyr. Dál qazir terezesi tars búrkelgen toıhanaǵa syrt kózge eleýsiz sańylaýdan syp etip kirip, «Qazaqtyń toıy bitpesin» dep sybyrlaı tilek aıtatyn kez emes. О́zimizdiń, jaqynymyzdyń amandyǵy úshin ondaı jasyryn jıyndarǵa barýdan bas tartsaq, indettiń betin qaıtarýǵa qosqan úlesimiz bolar edi.