Osy sýretke qaraǵan saıyn, odan bir jylylyq kórem. Ata men áje aldaryna nemeresin alyp, sonyń qyzyǵyna toımaı, tamashalap otyr. Bala kúnimizde osy kórinisti aýylda jıi kórdik. Ata-ájemiz bizdi de osylaı aldaryna alyp, qyzyqtap otyratyn. Jalpy, bul týyndynyń mańyzy zor, qaraǵan janǵa mazmundy oı salady. Avtor osy sýreti arqyly áke-sheshe men balanyń arasyndaǵy baılanys, urpaq jalǵastyǵy degen ómirlik qaǵıdany kórkem jetkizedi. Muny sýretshi 1968 jyly qaryndashpen salypty. Onyń ıesi ulttyq beıneleý ónerinde qaıtalanbas qoltańbasyn qaldyrǵan kórnekti qylqalam sheberi Shaımardan Sarıev.
Shaımardan aǵamyz beıneleý ónerine ótken ǵasyrdyń alpysynshy jyldary kelgen talantty tolqynnyń ókili. Osy býyndy ónertanýshylar «qatań stıl ókilderi» dep aıtady. О́ıtkeni olardyń shyǵarmalary epıkalyq sarynmen, tarıhı taqyryptarǵa barǵan batyldyǵymen jáne kompozısııalyq qurylymymen jurtshylyqty jalt qaratty. Osy býynnyń arasynan Sarıev óziniń eshkimge uqsamaıtyn darynymen daralandy.
Aıtalyq, sýretshiniń forma men tústiń úılesimin úndestire bilgen «Aral balyqshylary», «Munaıshylar», «Asan qaıǵy» atty kartınalarynan ulttyq boıaýǵa toly erekshelikti kóresiz. Bir ǵana «Shopan» týyndysyndaǵy shopannyń alaqanymen jas tóldi meıirlene ustaǵan sátin qandaı beıneli jetkizgen. Avtor osy eńbegi arqyly qazaqtyń meıirimdiligi men tynys-tirshiligin taza bederlegen.
О́nertanýshy Sandýǵash Myrzabekova Sarıev shyǵarmashylyǵynda tústerdiń qaıtalanbas qýaty men áseri erekshe ekendigin aıtady. «Sýretshiniń peızajdary men natıýrmorttaryna qarasańyz tylsym tabıǵat álemimen astasqan syrly saz ben dala únin birden baıqaımyz. Ol keńistik pen tústiń zańdylyqtaryn jetik meńgergen sheber», deıdi.
Qylqalam sheberi portret janrynda da ónimdi eńbek etip, tamasha týyndylardy ómirge ákeldi. Aıtalyq, «Lebiz ulynyń portreti» (1987), «Qulpytas portreti» (1986), «Shopannyń áıeli» (1980), «Turardyń portreti» (1967), «Áıeldiń portreti» (1968), «Avtoportret» (1986) jáne taǵy basqa eńbekterinde ár qyrynan alynǵan jeke beınelerdiń obrazy arqyly adamnyń jan-dúnıesin boıaý syrymen shynaıy asha bilgen. Bulardy beıneleý ónerimizdiń qazynasyna qosylǵan súbeli dúnıeler dep aıtýǵa bolady.
Shaımardan Sarıev – Atyraý ólkesinde ómirge kelip, orta mektepti támamdaǵannan keıin joldamamen Qaraǵandyǵa kelip, shahtada jumys istegen. Codan soń Almaty kórkem sýret ýchılıshesinde bilim alyp, Harkovtegi sýretshiler ınstıtýtyna oqýǵa túsedi. Odan keıin sýretshiniń shyǵarmashylyq joly, talaı talanttar toǵysqan Almatyda jalǵasady. «Jazýshy», «Jalyn» baspasynda qyzmet atqaryp, kitap kórkemdeýdiń maıtalmanyna aınaldy. 1982 jyly «О́ner» baspasynan «Tabıǵat aıasynda» atty kitaby jaryq kórdi. Elimizden basqa, О́zbekstan, Reseı, Ýkraına jáne t.b. elderde ótken kórmelerge jumystary qoıyldy.
Jalpy, talantty tulǵanyń joly ómirde jeńil bolyp kórgen emes. Shaımardan aǵa da tirshilikte biraz teperish kórdi. Ol jaıynda Qazaqstan Sýretshiler odaǵynyń múshesi Málik Qaıdarov: «Tirshiliktiń uly keńistiginde mańdaıyna jazylǵan talantty, júregin shymyrlatyp, jan-dúnıesin óksitken muńdy enshilep, óziniń ántek, ólshemge syımaıtyn minezimen, pishim qalpymen ǵumyr keshken sýretshi ómirdi, ómirdiń shynshyl shyraıyn, tynysyn tylsymy bólek boıaýlardan tapty. Bul – shyn máninde sýretshiniń sharq uryp izdep, kedergi, tosqaýyldardan taısaqtamaı ótip, ómirden, ónerden ózin ózi tabýy edi. Sondyqtan da bolar, jyldar boıy sezim zerdesinde oıanyp, qııalyn terbep, kóńil saraıynda jınaqtalǵan oı ushqyndarynyń toptamasyna – «Sýret týraly tolǵanystaryna» ol uly Pıkassonyń: «Men izdeımin, tabamyn!» degen áıgili sózin epıgraf etip alǵan», dep jazady.
Daryndy sýretker 1988 jyly týǵan jerinde aýyr naýqastan qaıtys boldy. Qazir Atyraýdaǵy oblystyq kórkemsýret jáne qoldanbaly-sándik óner mýzeıi Shaımardan Sarıevtiń esimimen atalady.