Keshe Premer-Mınıstrdiń orynbasary Eraly Toǵjanov elimizde buqaralyq jáne balalar sportyn damytýdyń qazirgi problemalary men perspektıvalary jóninde arnaıy keńes ótkizdi. Keńeske Mádenıet jáne sport mınıstri Aqtoty Raıymqulova, salalyq mınıstrlikterdiń, óńirler ákimdikteriniń basshylary jáne t.b. qatysty, dep habarlady Úkimet basshysynyń baspasóz qyzmeti.
Memleket basshysynyń tapsyrmasyna sáıkes sport salasy odan ári reformalaýdy talap etedi. Osyǵan baılanysty Premer-Mınıstrdiń orynbasary memlekettik organdardyń aldyna birqatar mańyzdy mindet qoıdy: • Buqaralyq jáne balalar sportymen aınalysýdyń qoljetimdiligin arttyrý. Bıyl halyqtyń sportpen shuǵyldanýyn keminde 35% nátıjege jetkize otyryp (búgingi kúni – 31,6%), nysanaly kórsetkishterdi qaıta qaraý tapsyryldy. Ol úshin ákimdikterge memlekettik sporttyq tapsyrys kólemin ulǵaıtý, qosymsha balalar, jasóspirimder klýbtaryn, balalar-jetkinshekter sport klýbtaryn ashý, mektep jáne stýdentter sport lıgalarynyń jumysyn qaıta bastaý esebinen balalarǵa arnalǵan tegin sport seksııalaryn keńeıtý tapsyryldy. Sondaı-aq Qostanaı, Atyraý jáne Mańǵystaý oblystarynda sport mektep-ınternattarynyń bolmaýyna baılanysty osy óńirlerdiń ákimdikterine olardyń qurylysyn bastaý máselesin sheshý tapsyryldy. • Sport obektilerin materıaldyq-tehnıkalyq jaraqtandyrý deńgeıin arttyrý. Osy jyldyń sońyna deıin ákimdikterge 43 dene shynyqtyrý-saýyqtyrý kesheniniń qurylysyn aıaqtaý, Work-out alańdary men basqa da shyǵynsyz sport ǵımarattarynyń jelisin keńeıtý tapsyryldy. Sport nysandarynyń tolyq júktelýine erekshe nazar aýdarý tapsyryldy. • Nur Otan partııasynyń mamandandyrylǵan sport mektepteri oqytýshylarynyń jalaqysyn 2023 jylǵa deıin eki ese arttyrý, 2025 jylǵa deıin árbir aýyldyq okrýgti sport nusqaýshysymen qamtamasyz etý jónindegi jol kartasy is-sharalarynyń oryndalýyn erekshe baqylaýǵa alý. • Úzdik halyqaralyq tájirıbeni eskere otyryp, kásibı sportshylardy, onyń ishinde ulttyq qurama komandalaryn daıarlaý tásilderin qaıta qaraý jáne buqaralyq, kásibı sport úshin sport mamandarynyń (sport psıhologteri, bıomehanıkter, bıohımıkter, dıetologter jáne t.b.) tapshylyǵy máselesin sheshý boıynsha arnaıy baǵdarlama ázirleý tapsyryldy. • Sportqa baǵyttalatyn bıýdjettik jáne bıýdjetten tys qarajattyń tıimdi jumsalýyna qatań baqylaýdy qamtamasyz etý. • Sala aldynda turǵan jańa mindetterdi eskere otyryp, 2025 jylǵa deıingi dene shynyqtyrý men buqaralyq sportty damytý jónindegi qabyldanǵan keshendi jospardy qaıta qaraý. • Mádenıet jáne sport mınıstrliginiń elde buqaralyq jáne balalar sportyn damytý bóligindegi ókilettikterin keńeıtetin zańnamalyq túzetýlerdi qabyldaýdy qamtamasyz etý. Buqaralyq jáne balalar sportyn damytý jaıy Úkimettiń erekshe baqylaýynda bolady.