Senat depýtaty Nurlan Bekenov Aqmola oblysynyń Astrahan aýdanyna baryp, jergilikti sharýalarmen kezdesti, dep habarlady joǵarǵy Palatanyń baspasóz qyzmeti.
Senator sondaı-aq mal azyǵyn daıyndaý jáne aýyl sharýashylyǵy daqyldary egininiń jaı-kúıi máseleleri jónindegi jedel shtabtyń otyrysyna qatysty. Depýtat óz sózinde bıylǵy aýa raıynyń qolaısyzdyǵyna baılanysty aldaǵy qysqa jemshóp daıyndaý máselesi óte ózekti ekenin atap ótti.
«Qysqa mal azyǵyn daıarlaý úshin aýdan halqyn qajetti jem-shóppen qamtamasyz etý mańyzdy. Aýyl turǵyndaryna egin jınaý naýqanynda sáttilik tileımin!», dedi Nurlan Bekenov.
Ol byltyr kúrdeli jóndeý jumystary júrgizilgen aýdandyq aýrýhanaǵa arnaıy bardy. Dárigerlermen kezdesýde halyqqa medısınalyq kómek kórsetý, tegin dárilik preparattarmen qamtamasyz etý jáne aýdanda koronavırýstyq ınfeksııaǵa qarsy vaksınalaý máseleleri talqylandy.
Depýtat Astrahanka aýylynda jaqynda salynǵan dene shynyqtyrý-saýyqtyrý kesheniniń qyzmetimen de tanysty. Bul kópbeıindi nysanda fýtbol, basketbol, voleıbol alańdary, jattyǵý zaly men júzý basseıni bar. Nurlan Bekenov aýylda osyndaı ortalyqtardyń ashylýy jáne onyń jergilikti halyqqa qoljetimdi bolýy asa mańyzdy ekenin atap ótti.
«Memleket basshysynyń tapsyrmasyna sáıkes elimizde buqaralyq sportty damytýǵa basa mán berilip otyr. Osy baǵytta aýdandarda jańa sport nysandaryn salý, jumys istep turǵan ortalyqtardyń materıaldyq bazasyn jaqsartý, onyń ishinde qazirgi zamanǵy sporttyq buıymdar alýdyń mańyzy zor», dedi senator.