Ispanııanyń ulttyq aýa raıy agenttigi Aemettiń habarlaýynsha, eldegi alty aımaqtaǵy on provınsııada aptap ystyq bolýy múmkin. Osyǵan baılanysty agenttik joǵary temperatýradan saqtaný qajettigin eskertti.
Aemet ókili Rýben del Kampo sársenbide bastalatyn joǵary temperatýra qalypty emes ekenin jetkizgen. Onyń sózine súıensek, aptap ystyq naǵyz qyzǵan shaǵyna endi shyqpaq.
«Elde tirkelgen temperatýra rekordy jańartylatynyn joqqa shyǵara almaımyz», deıdi ol. Sınoptıkterdiń boljamyna sáıkes, beısenbiden bastap aýa temperatýrasy eldiń ońtústik jartysynda, atap aıtqanda, Gvadalkvıvır alqabynda 44 gradýstan 45 gradýsqa deıin jetýi múmkin.
Aptap ystyq Kantabrııanyń soltústigi men Galısııanyń bir bóligin qospaǵanda, búkil Ispanııaǵa áser etedi. Juma men senbi eń ystyq kúnder bolýy múmkin. Termometr kórsetkishi Pıreneı túbeginiń ońtústiginde, shyǵysynda jáne ortalyǵynda jáne Balear araldarynda 40 gradýsqa deıin kóteriledi.
Sonymen qatar Andalýsııanyń ońtústik aımaǵynda eń joǵary temperatýra 44 gradýstan asady dep kútiledi. Tún de ystyq bolmaq. Jeksenbide aptap ystyq tómendeıdi, al dúısenbide aýa temperatýrasy qalypqa keledi dep kútilip otyr.