QARAǴANDY TEATRY ORALDA

Bul kúnderi Batys Qazaqstan oblystyq qazaq dra­ma teatrynyń ǵımaratynda Qaraǵandy oblystyq S.Seıfýl­lın atyndaǵy qazaq drama teatrynyń gastroli ótýde. Shalqar kóli jaǵasynda dúnıege kelip, Oral qala­syndaǵy S.Seıfýllın atyndaǵy №11 mektepte bilim alǵan, Qaraǵandy teatrynyń búgingi dırektory ári kór­­­kem­dik jetekshisi, Qazaqstannyń eńbek sińirgen ártisi, Memlekettik syılyqtyń laýreaty Keńes Juma­bekovtiń aıtýynsha, teatr Uly Jeńistiń 65 jyldyǵy­na oraı osynyń aldynda úlken qurammen Atyraýda bolsa, endi Oralǵa jol túsip otyr. Qaraǵandy teatrynyń 78 jyldyq tarıhy bar. Munda kezinde Qazaqstannyń halyq ártisteri Jámılash Shashkına, Ásııa Ablaeva, Qaraǵan­dybek Sataev syndy sahna sańlaqtary eńbek etken. Odan keıin de birneshe býyn almasqan teatr tek Qazaq­stan ǵana emes, alys-jaqyn shet elderde de óner kórsetip keledi. Gastrol shymyldyǵy Muhtar Áýezovtiń “Aıman-Sholpan” mýzykalyq komedııasymen (rejısseri – Esmuqan Obaev) ashyldy. Premerasy ótkenine eki jyl tola qoı­maǵan spektaklde Aıman beınesin Bota Maqsutova somda­sa, Sholpandy taǵy bir jalyndy jas ártis Baıan Áý­keshova shyǵardy. Qoıylymdaǵy alýan túrli keıipker­lerdi Dýman Espaev, Qaırat Kemalov, Slambek Jumaǵalı, Nurjibek Jansúgirova jáne basqalar sahana tórinen kórsetti. Oraldyqtardy qaraǵandylyqtar budan keıin de M.Hasenovtiń “Hi-Fi mahabbatymen”, Álimbek Orazbekovtiń “Bir túp alma aǵashymen” Sultanáli Balǵabaev­tyń “Ǵashyqtar bolmaıtyn ǵasyrymen” Sáken Júnisovtiń “Jaraly gúlderimen” jáne Ospanhan Áýbákirovtiń balalarǵa arnap jazǵan “Qoja men sport” ertegisimen sýsyndatty. Temir QUSAIYN, ORAL.