QR Memlekettik hatshysy Qyrymbek Kósherbaev elimizdiń sport salasyna kezek kúttirmes reformanyń qajettigin alǵa tartty, dep habarlaıdy Egemen.kz.
«QR Prezıdenti Qasym-Jomart Toqaev sizderdiń el aldyndaǵy eńbekterińiz ben Olımpıadadaǵy jetistikterińizdi eskerip, memlekettik nagradalarmen marapattaý týraly jarlyq qabyldady. Bul eńbektiń elengeni, tógilgen terdiń óteýi dep bilemiz. Marapattaryńyz qutty bolsyn!
Osy oraıda bir máseleni aıtpaı ketýge bolmaıdy dep oılaımyn, Tokıo Olımpıadasy elimizdegi sport salasynyń shynaıy bet-beınesin ashyp, ondaǵy ahýaldyń qandaı ekenin ashyq kórsetti.
Sport salasyna shuǵyl reforma qajettigi kórinip tur. Birde-bir sportshynyń altyn nemese kúmis júldege qol jetkize almaýy buryn- sońdy bolmaǵan jaǵdaı. Jalpy komandalyq esepte 83 oryndy mise tutý bizdiń elimiz úshin árıne syn», dedi Qyrymbek Kósherbaev.
Onyń aıtýynsha, Tokıo Olımpıadasyna qatysty jankúıerlerdiń syn-eskertpeleri men halyqtyń talaby oryndy.
«Sondyqtan Tokıo Olımpıadasynan sabaq alyp, qorytyndy shyǵarýymyz qajet. Memleket basshysy Qasym-Jomart Toqaev ulttyq quramanyń bul kórsetkishi Qazaqstannyń sporttyq áleýetine jáne memleket tarapynan sportty damytýǵa bólinip otyrǵan mol qarajatqa sáıkes kelmeıdi dep naqty aıtty.
Memleket sportty órkendetý úshin, sportshylarymyzdyń álemdik arenada Qazaqstannyń namysyn abyroımen qorǵaýy úshin bar jaǵdaıdy jasap otyr, qarjy ýaqytyly bólinedi, oqý-jattyǵý jıyndary der kezinde uıymdastyrylady. Ulttyq qurama músheleriniń materıaldyq turǵydan tapshylyq kórgen kezi joq. Sporttyq ınfraqurylym jyl saıyn jańaryp keledi, degenmen nátıje áli tómen», dedi Q. Kósherbaev.