Kúni keshe 14 tamyzda Qazaqstannyń eńbek sińirgen demograf-statıstıgi Erbolat Musabek 76 jasqa qaraǵan shaǵynda ómirden ozdy. Bul týraly Strategııalyq josparlaý jáne reformalar agenttigi Ulttyq statıstıka bıýrosy habarlady, dep jazady Egemen.kz.
E.Musabek 1946 jyly Jambyl oblysynyń Shoqpar stansııasynda dúnıege kelgen. 1970 jyly Abaı atyndaǵy Qazaq pedagogıka ınstıtýtyn matematıka mamandyǵy boıynsha úzdik bitirgen. Eńbek jolyn 1963 jyly Qazaq temir joly №34 jol bóliminde temir jol jumysshysy bolyp bastaǵan. 25 jyldan astam ýaqyt Qazaq KSR Memjospar komıtetiniń Esepteý ortalyǵynda qyzmet istedi. Halyq sharýashylyǵyn jetildirýdi josparlaý jumystaryna sińirgen qomaqty úlesi úshin 1977 jyly «Halyq sharýashylyǵyn josparlaý úzdigi» degen belgisimen marapattalǵan.
Erbolat Nyǵymanuly memlekettik statıstıka organdarynda 1997 jyldan bastap jumys istedi. 1971 jyldan beri demografııalyq zertteýlermen, ár túrli demografııalyq esepteýlerdiń baǵdarlamalyq jasaqtamasyn ázirleýmen jáne ony júrgizýmen aınalysty. Ol talaı halyqaralyq semınarlar men jobalarǵa qatysty. 20-dan astam jarııalanymy bar. Kelýshiler ádisi boıynsha «Halyq kóshi-qony», «Janbasylyq halyq tirkelimi» keshenderin jasap, jetildirip, ákimshilik-aýmaqtyq nysandar jikteýishin qurastyryp, ony vedomstvolyq, keıin memlekettik jáne ulttyq jikteýish retinde qoldanysqa engizdi.
Sonymen qatar Qazaqstandaǵy alǵashqy mýltı-ındıkatorlyq klasterlik zertteýdi (MIKZ) basqaryp, bul zertteýdiń derekter bazasyn qurastyrdy jáne keıingi MIKZ-lerdi júrgizýge, qorytyndylaryn shyǵarýǵa belsene atsalysty. 2009 jyly Ulttyq halyq sanaǵynyń qorytyndysyn shyǵarý kezinde aıanbaı eńbek etti. Sondaı-aq E.Musabek elimizde eki ret jaryq kórgen «Qazaqstannyń Etnodemografııalyq jylnamalyǵynyń» avtory. 2009 jyly Qyrǵyzstandaǵy Halyq sanaǵynyń keńesshisi qyzmetin atqardy. 2007-2011 jyldary Qazaqstannyń demograftar qaýymdastyǵynyń prezıdenti body.
Memleketke sińirgen eńbegi, belsendi qoǵamdyq qyzmeti jáne eldiń áleýmettik-ekonomıkalyq damýyna qosqan úlesi úshin 2005 jáne 2016 jyly eki márte Qazaqstan Prezıdentiniń «Qurmet» gramotasymen marapattaldy.
Joǵary kásibıligi jáne Qazaqstannyń memlekettik statıstıkasyn jetildirýge qosqan zor úlesi úshin 2005 jyly «Qazaqstan statıstıkasynyń úzdigi» ataǵy jáne «Densaýlyq saqtaý isine qosqan úlesi úshin» tósbelgisi berildi. 2011 jyly «Qurmet» ordenimen jáne «Qazaqstan Respýblıkasynyń táýelsizdigine 20 jyl» mereıtoılyq medalimen, 2014 jyly «Eńbek Ardageri» medalimen jáne «Statıstıka úzdigi» tósbelgisimen, 2015 jyly «Qazaqstan halqy Assambleıasyna 20 jyl» mereıtoılyq medalimen, 2016 jyly «IýNISEF-ke 70 jyl» mereıtoılyq medalimen, 2021 jyly 75 jyldyq mereıtoıyna alǵys hattarmen marapattalǵan.
Erbolat Nyǵymanuly Qazaqstannyń belgili demografy, eńbek sińirgen qaıratkeri, óz isiniń sheberi jáne talantty adam edi. Onyń barlyq eńbegi Qazaqstannyń demografııansyn damytýǵa jáne qalyptastyrýǵa baǵyttaldy jáne onyń jumystary TMD elderinde de keńinen tanymal boldy.
«Erbolat Nyǵymanulynyń demografııalyq ǵylym men demografııalyq taldaýdyń damýyna qosqan úlesi baǵa jetpes. Marqumnyń jarqyn beınesi bizdiń esimizde máńgi saqtalady! Strategııalyq josparlaý jáne reformalar agenttigi Ulttyq statıstıka bıýrosy marqumnyń áriptesterine, týǵan-týystaryna, jaqyndaryna qaıǵyryp kóńil aıtady», dedi Strategııalyq josparlaý jáne reformalar agenttigi Ulttyq statıstıka bıýrosynyń basshysy Nurbolat Aıdapkelov.