Keshe, qańtardyń 17-si kúni úsh jyldan beri aılyqtaryn ala almaı júrgen bir top jumysshy ortalyq alańǵa shyqty. Bul týraly Ras. kz habarlady.
«Qyzylordalyq bir top jumysshy, mektepti bıýdjetten bólingen qarajatqa emes, nesıege saldyq, dep alańǵa shyqty», – delingen habarlamada.
Belgili bolǵandaı, budan úsh jyl buryn Aral aýdanyna qarasty Sazdy aýylynda mektep salǵan 300-ge jýyq jumysshy men 10 kásipker áli kúnge deıin aılyqtaryn tolyq ala almaǵan kórinedi. «Memlekettiń ózderine bereshegin 55 mıllıon teńgege balap otyrǵan narazy top «qomaqty qarajat ushty-kúıli joq bolyp ketti» dep qapaly», – dedi arna tilshisi.
Rasynda da olar Sazdy aýylynda 140 oryndyq mektep qurylysyn júrgizgen. Tipti, qazyna karjysymen qabyrǵasy qalanǵan mekeme qurylysyn mejelengen merziminen buryn ótkizipti. Alaıda, áli kúnge aılyqtaryn tolyq ala almaǵan. Merdiger mekeme keıbir kásipkermen esep aıyrysý úshin bankten nesıe de alǵan kórinedi. «Tek ol soma qaryzdan qutqarmady», – deıdi olar.
«Sazdy mektebinde ekskavator traktorymdy jalǵa alǵan. Sodan 2009-dan beri 2 mln. 200 myń teńgemizdi áli ala almaı júrmiz. 4 jyl boldy», – dedi tehnıkany jalǵa berýshi mekeme ókili Temirhan Mahanov.
Jumysshylardyń aıtýynsha, memlekettik tapsyryspen qurylysy júrgen mektepti támamdaýǵa 10 kásipker men 300-ge jýyq jumysshy jumyla kirisken. Tipti, alys aýdanǵa barar joldyń joqtyǵy da jumystaryna kedergi keltirmepti, jolaı aýylǵa aparar jol salǵan, aýyz sý úshin, qudyq qazypty. Tek bul eren eńbek elenbedi, jeme-jemge kelgende, qazynadan bólingen tıesili teńgeden qaǵylyp qalǵan.
«Biz 55 mıllıon teńgeni ala almaı otyrmyz. Onyń tolyp jatkan sebepteri bar, bul boıynsha oblystyq qarjy polısııasy Qylmystyq kodekstiń 325-baby 2-bóligimen qylmystyq is te qozǵaǵan», – dedi merdiger kompanııanyń dırektory Abylaı Qalılaev.
Biraq qozǵalǵan qos qylmystyq is te qysqartylǵan. Sebebin túsindirmedi deıdi narazy top. Qazir merdiger mekeme basshysynyń qolynda bir-birinen aýmaıtyn, bir kúnde shyǵarylǵan qos qujat bar. Aıyrmashylyǵy – bıýdjetten bólingen somanyń alshaqtyǵy ǵana. Biraq bir kúnde shyǵarylǵan bir buıryqtaǵy sandardyń sál ǵana túzetilýi qurylysshylardy qomaqty qarjydan qaqqan. Al oblystyq ákimdiktegiler, merdiger mekeme sandaǵy bul sáıkessizdikti sot arqyly dáleldeı alatyn bolsa, shyǵyndy óteýge ázirmiz dep otyr.
«Eger sot dáleldep, 346 mıllıon emes 384 mıllıon teńge dep dáleldep berip jatsa, bizge eshqandaı qıynshylyq týyp turǵan joq. Onda mindetti túrde oblystyq bıýdjetten qarastyryp berýge daıynbyz», – dedi oblys ákiminiń orynbasary Nurjan Álibaev.
Al narazy top másele qańtardyń aıaǵyna deıin sheshilmese, naqty qadamdarǵa baratyndaryn aıtyp otyr. Memlekettik tapsyryspen mektep salyp, úsh jyldan beri jalaqylaryn ala almaı júrgen jumysshylar toby Úkimet endi úndemese, onda máselemizdi halyqaralyq deńgeıde kóteremiz deıdi.
Hamıt Mustafa.
Derekkóz: Ras.kz
Foto: Ras.kz.