Oblys ákimi Gúlshara Ábdiqalyqova Tokıo Olımpıadasyna qatysqan qyzylordalyq sportshylar Qamshybek Qońqabaev, Dáýlet Nııazbekov jáne Móldir Jańbyrbaımen kezdesti.
Aımaq basshysy Syr jurtshylyǵy atynan óńir tarıhynda alǵash ret bokstan olımpııa oıyndarynyń qola júldesin alǵan Qamshybek Qońqabaevty quttyqtap, Dáýlet Nııazbekov pen Móldir Jańbyrbaıǵa el namysyn aıanbaı qorǵaǵandary úshin alǵysyn aıtty.
– Eki apta boıy oblys halqy alamanǵa úkilep shyǵaryp salǵan úmitteriniń tileýin tilep, jankúıer boldy. Alys saparǵa, jaýapty jarysqa attanǵan ul-qyzdarymyz senimdi aqtady. Al Qamshybektiń altynǵa bergisiz qola júldesi talaı baldyrǵannyń qııalyna qanat bitirip, Syr halqynyń kópten kútken armanyn júzege asyrdy.
El Prezıdentinen Memlekettik Týdy alyp, álem myqtylary bas qosqan saıysta ustap shyǵý qashanda úlken mártebe, zor senim. Bul mindetti jerlesimiz Qamshybek Qońqabaev abyroımen aqtap, baıraǵymyzdy Olımpıada tórinde jelbiretti, – dedi oblys ákimi.
Bıyl aımaq sportshylary kóptegen jarystardan oljamen oraldy. Jyl basynan beri jerlesterimiz el birinshilikterinde 700 medal jeńip alsa, álem, Azııa chempıonattarynda 46 medalǵa qol jetkizdi.
Kezdesýde oblys ákimi el namysyn abyroımen qorǵap shyqqan Qamshybek Qońqabaevqa avtokólik kiltin tabystasa, bapkeri Seıitjan Tókenov, Olımpıada oıyndarynyń qatysýshylary Dáýlet Nııazbekov pen Móldir Jańbyrbaı 1 mln teńgeniń sertıfıkatyn ıelendi.
Eldiń rýhy men mártebesin kótergen sportshylarǵa «Dalatex» JShS basshysy Dilmuhamed Abızov, «Nurlen» JShS jetekshisi Qaırat Boranbaev, «Melıorator» seriktestiginiń dırektory Berdibek Myhanov pen «Standart Oıl KZO» kompanııasyn basqaratyn Ádil Bıjanov sekildi mesenat azamattar demeýshilik jasap, qoldaý kórsetti.
Sharada Sport kúni kásibı merekesine oraı №4 olımpıadalyq rezervtiń mamandandyrylǵan balalar men jasóspirimder mektebiniń jattyqtyrýshysy Vladımır Leptıkov pen Q.Muńaıtpasuly atyndaǵy sport klýbtyń dırektory Jamal Bozovaǵa Mádenıet jáne sport mınıstrliginiń tósbelgisi men Qurmet gramotasy tabystaldy.
Olımpıadanyń qola júldegeri Qamshybek Qońqabaev pen jeke bapkeri Seıitjan Tókenov sportshylarǵa kórsetilgen qoldaýǵa rızashylyǵyn bildirip, alda da jerlester senimin aqtaýǵa kúsh salatynyn aıtty.
Sondaı-aq jıynda aýyr atletıkadan 4 dúrkin álem chempıony, Qazaqstannyń eńbek sińirgen sport sheberi Ilıa Ilın Qamshybekti jeńisimen quttyqtap, Móldir men Dáýletke aldaǵy saıystarda sáttilik tiledi jáne áriptesterine kásibı merekelerine oraı tilegin arnady.
Qyzylorda